Qarjy polıtsııasy: «Aýyz sý» baǵdarlamasy aıasynda jasalǵan 73 qylmystyq is anyqtaldy, memleketke keltirilgen shyǵyn - 484,5 mln. teńge
ASTANA. 23 aqpan. QazAqparat - «Aýyz sý» baǵdarlamasy aıasynda jasalǵan 73 qylmystyq is anyqtaldy, memleketke keltirilgen shyǵyn 484,5 mln. teńgeni quraıdy.
Bul týraly búgin QR Ekonomıkalyq jáne sybaılas jemqorlyqpen kúres agenttiginiń resmı ókili Murat Jumanbaı málim etti.
«Turǵyndardy qajetti mólsherdegi jáne kepildengen sapadaǵy aýyz sýmen turaqty qamtamasyz etýge baǵyttalǵan «Aýyz sý» baǵdarlamasy boıynsha qarjy polıtsııasy organdarymen 2010-2011 jyldary 73 qylmystyq is qozǵaldy, memleketke 484,5 mln. teńge zalal keltirilgen», - dedi M.Jumanbaı.
Mysaly, Ońtústik Qazaqstan oblysynda 3 jylǵa bas bostandyǵynan aıyrýǵa Ordabasy aýdany Qurylys bóliminiń bastyǵy A.Toqsabaev jáne 1,6 jylǵa bas bostandyǵynan aıyrýǵa «Temirlan» memlekettik kommýnaldyq mekemesiniń burynǵy dırektory M.Sádenov sottaldy. «Sádenov «Aýyz sý» baǵdarlamasy boıynsha Ordabasy aýdanynyń sýmen jabdyqtaý júıesine jóndeý júrgizý kezinde «Salkyn-2001» JShS-ne 11,9 mln. teńgege atqarylǵan jumystardyń jalǵan aktilerine qol qoıǵan. Qurylys aktilerine jalǵan málimetterdi Toqsabaev engizgen», - dedi ol.
Sonymen qatar resmı ókildiń aıtýynsha, Shyǵys Qazaqstan oblysynda shartty túrde 3 jylǵa bas bostandyǵynan aıyrýǵa Kúrshim aýdandyq sáýlet jáne qala qurylysy bóliminiń bastyǵy E.Moldahanov sottaldy. Ol 2010 jyly Quıǵan aýylynda sý qubyrlary men qurylystaryn qaıta qurý jumystary boıynsha jalǵan jumys aktilerine qol qoıǵan. Sonyń nátıjesinde memleketke 44,8 mln. teńge zalal keltirilgen.
