Qarjy polıtsııasy AShM-niń 1,7 mlrd. teńgeni tıimsiz jumsaýyna jol bermedi
ASTANA. QazAqparat - QR Aýyl sharýashylyǵy mınıstrliginiń vıtse-mınıstri M.Ómirııaev pen onyń qorǵaýshysyn qylmystyq is materıaldarymen tanystyrý aıaqtaldy, dep habarlady QR Ekonomıkalyq jáne sybaılas jemqorlyqqa qarsy kúres agenttiginiń baspasóz qyzmetinen.
Vedomstvonyń aqparatyna qaraǵanda, ol aýsyl aýrýyna qarsy vaktsınany memlekettik satyp alý konkýrsynda jeńiske jetýde kómek kórsetkeni úshin kásipkerden 100 myń AQSh dollary jáne 6 mln. 950 myń teńge somasynda para aldy dep aıyptalýda. Jaqyn ýaqytta qylmystyq is aıyptaý qorytyndysymen prokýratýra organdaryna ári qaraı sotqa joldaý úshin jiberildi.
«Atalǵan isti tergeý barysynda Qarjy polıtsııasy agenttigi Aýyl sharýashylyǵy mınıstrligimen aýsyl aýrýyna qarsy vaktsınany satyp alýǵa bólingen 1,7 mlrd. teńge bıýdjet qarajatyn tıimsiz jumsaýdyń jolyn kesti. 2013 jyly óndirýshi zaýytpen (RF, Vladımır qalasy) iri qara malǵa aýsyl aýrýyna qarsy vaktsınanyń bir dozasyn 63 teńgege baǵasymen shyǵarylatyny anyqtaldy, al QR Aýyl sharýashylyǵy mınıstrligi árbir dozany 3 ese qymbatqa, ıaǵnı 220 teńgege satyp alǵany anyqtalǵan», - delingen habarlamada.
2014 jyly Aýyl sharýashylyǵy mınıstrligi aýsyl aýrýyna qarsy vaktsınanyń bir dozasyn 232,73 teńge baǵasymen satyp alýdy josparlaǵan. Atalǵan vaktsınaǵa bıýdjetten 4,34 mlrd. teńge bólingen. 2014 jylǵy 28 aqpanda vaktsınanyń 1 dozasyn 232,73 teńge baǵasymen satyp alýǵa konkýrs jarııalanǵan.
Alaıda 2014 jylǵy naýryzda Qarjy polıtsııasy agenttigi Aýyl sharýashylyǵy mınıstrligine memlekettiń ekonomıkalyq múddesine zalal keltirýmen birge jańa sybaılas jemqorlyq qylmystaryn jasaýǵa jaǵdaı týyndaǵanyn aıtyp, onyń ishinde satyp alynatyn vaktsınanyń kóterme baǵasyn atap, osy jaǵdaılardy joıý boıynsha hat joldady. Qarjy polıtsııasy aralasqan soń, QR Aýyl sharýashylyǵy mınıstrligi aýsyl aýrýyna qarsy vaktsınanyń baǵasyna saraptaý júrgizý arqyly jarııalanǵan konkýrsty ótkizbedi.
Nátıjesinde, 2014 jylǵy 18 shildede QR Aýyl sharýashylyǵy mınıstrligi jańadan konkýrs jarııalady. Aýsyl aýrýyna qarsy vaktsınanyń bir dozasyn satyp alý baǵasy 110 teńgege deıin azaıtyldy.
Sonymen, Qarjy polıtsııasy agenttigi Aýyl sharýashylyǵy mınıstrligimen 1,7 mlrd. teńgeden astam bıýdjet qarajatyn negizsiz jumsaýdyń jolyn kesip, sybaılas jemqorlyq qylmystaryn jasaýǵa sebep bolatyn jaǵdaılardy joıdy.
