Qarjy polıtsııasy araqty zańsyz shyǵarǵan 30-ǵa jýyq zaýyt pen tsehty anyqtady
ASTANA. 27 jeltoqsan. QazAqparat - Bıyl QR Ekonomıkalyq qylmys jáne sybaılas jemqorlyqqa qarsy kúresi agenttigi (Qarjy polıtsııasy) respýblıka boıynsha araqty zańsyz shyǵarǵan 30-ǵa jýyq zaýyt pen tsehty anyqtady. Onyń ishinde esepke alynbaǵan alkogol ónimin shyǵarǵan 7 zaýyt jáne spırttik ishimdikterdi qoldan quıýmen aınalysqan 22 astyrtyn tseh bar.
Máselen, osy aıda Aqtóbe oblysynda túngi ýaqytta aktsızdik beket qyzmetkerleriniń joǵyn paıdalanyp, alkogol ónimin shyǵarǵan «AkRossPışeprom» JShS araq-sharap zaýytynyń zańsyz qyzmeti áshkerelendi. Zaýyt aýmaǵynan, sondaı-aq Aqtóbe qalasyndaǵy saýda núktelerinen atalǵan zaýytta shyǵarylǵan jalpy sany 600 myń shólmek araq tárkilendi. Odan bólek, zaýyt bólmelerinde jáne quıý tsehy bastyǵynyń úıinde 800 myńnan astam jalǵan esepke alý baqylaý markasy tabyldy.
Al Almaty oblysynyń qarjy polıtsııasy departamentiniń qyzmetkerleri belgili qazaqstandyq shyǵarýshynyń atyn jamylyp, qoldan jasalatyn konıak shyǵarǵan astyrtyn tsehtyń qyzmetin toqtatty. Qarasaı aýdanynyń Alǵabas aýylynda ornalasqan bul zańsyz tsehtan 8 myń shólmek kontrafaktilik konıak tárkilendi.
