Qarjy polıtsııasy Ana men bala ortalyǵynyń burynǵy atqarýshy dırektoryna qatysty qylmystyq isti tergeýdi aıaqtady
ASTANA. 22 mamyr. QazAqparat - Ekonomıkalyq qylmysqa jáne sybaılas jemqorlyqqa qarsy kúres agenttigi (Qarjy polıtsııasy) «Ana men bala ulttyq ǵylymı ortalyǵy» AQ-nyń burynǵy atqarýshy dırektory Ordabekovke qatysty qylmystyq istiń tergeýin aıaqtady. Bul týraly vedomstvonyń baspasóz qyzmetinen habarlady.
«Ordabekov taýarlar men qyzmetterdi satyp alý barysynda birneshe ret para aldy dep aıyptalýda. Máselen, Ordabekov Ana men bala ortalyǵynda emdik jáne qoǵamdyq tamaqtaný qyzmetterin usyný boıynsha konkýrsta jeńýge kómek kórsetkeni úshin D. esimdi jeke kásipkerden 10 mln. 750 myń teńge kóleminde para aldy dep aıyptalýda", - delingen taratylǵan baspasóz habarlamasynda.
Sonymen birge Ordabekovke óziniń qyzmettik ókilettigin paıdalana otyryp, alaıaqtyq jolmen Ana men bala ulttyq ǵylymı ortalyǵymen dári-dármekterdi jetkizý jóninde kelisimshart jasasýǵa kómek kórsetkeni úshin kásiporyndar biriniń dırektorynan 2 mln. 400 myń teńge alǵan degen aıyp taǵylyp otyr.
Budan basqa, Ordabekov ózge JShS-nyń bas dırektorynan júıelerdi jańǵyrtý boıynsha memlekettik satyp alýlar konkýrsynda ony jeńimpaz dep taný úshin 1 mln. 700 myń teńge para alǵan dep aıyptalýda.
Qazirgi ýaqytta aıyptalýshy jáne onyń qorǵaýshylary qylmystyq istiń materıaldarymen tanysý barysynda.
