Qarjy polıtsııasy alkogol men munaıdyń zańsyz aınalymyn azaıta otyryp, bıýdjet túsimin arttyrdy
ASTANA. 30 shilde. QazAqparat - Qarjy polıtsııasy agenttiginiń alkogoldik ónimniń zańsyz aınalymy salasyndaǵy qylmystardy ashýy 2 ese artqan.
Bul jóninde búgin vedomstvo basshysy Rashıd Túsipbekov alqa otyrysynda aıtty.
Júrgizilgen jumystyń nátıjesinde bıýdjetke araq ónimderin satýdan ǵana aktsızdik tólemderdiń 25%-ǵa artqany baıqalady.
Buǵan qosa, qazir alkogol óndirýshileri shyǵarylǵan ónimniń naqty kólemin kórsetýge jáne olardan salyq tóleýge májbúr. Buǵan dálel - elimizdegi tirkelgen alkogol óniminiń 7%-ǵa ósý úrdisi.
Sondaı-aq, munaı men munaı ónimderiniń zańsyz aınalymyn áshkereleý 3 ese artqan.
Nátıjesinde Munaı jáne gaz mınıstrliginiń málimetterine sáıkes, Atyraý munaı óńdeý zaýytyna ǵana kelip túsetin shyǵýy kúmándi munaıdyń mólsheri 2010 jylǵy 300 myń tonnadan osy jylǵy 1,5 myń tonnaǵa deıin azaıǵan.
«Bul sharalardyń barlyǵy kóleńkeli aınalymnyń shyn máninde tómendeýine jáne memleket úshin ekonomıkalyq nátıjege qol jetkizýge múmkindik berdi», dep atap ótti R. Túsipbekov.
