Qarjy polıtsııasy: Aqmola oblysy aýdandarynyń biriniń aýyl sharýashylyq bólimi AI-92 benzıniniń 1 lıtrin 325 teńgeden satyp alýdy josparlaǵan
ASTANA. 22 tamyz. QazAqparat - Qarjy polıtsııasy agenttiginde ótken jyldan bastap mamandandyrylǵan Sıtýatsııalyq ortalyq jumys jasaýda. Ol memlekettik organdar bazalarynyń málimetteri men basqa da ashyq aqparat kózderindegi maǵlumat resýrstaryn paıdalaný jolymen eldegi qylmystyq jaǵdaıdy saralaıdy, dep habarlady atalǵan vedomstvonyń baspasóz qyzmetinen.
Atalǵan ortalyqtyń qyzmeti jumys ornynan shyqpaı, taldaý jolymen qylmystardy bastapqy kezeńderde anyqtap, olardyń jolyn kesýge múmkindik beredi. Onyń sarapshylary baǵalary asyrylǵan satyp alýlardy anyqtaý jáne ýaqytyly áshkereleý maqsatynda memlekettik organdar men ulttyq kompanııalardyń satyp alýlar josparlaryna kún saıynǵy rejimde monıtorıng jasaıdy. Osylaısha qarjy polıtsııasy jyldyń basynan beri 3 mlrd. teńgege jýyq bıýdjet qarajatyn tıimsiz paıdalanýdan saqtap qaldy.
Mysaly, osy aıda Aqmola oblysynyń aýdandarynyń biriniń aýyl sharýashylyq bólimimen josparlanǵan AI-92 benzınniń 1 lıtrin 325 teńgeden satyp alýǵa jol berilmedi. Qarjy polıtsııasynyń ýaqytyly is-áreketteriniń arqasynda 1 mlrd. teńge bıýdjet qarajaty únemdeldi, konkýrs ótkizilgen jaǵdaıda bul somanyń urlanýynyń yqtımaldyǵy óte joǵary edi.
Osyndaı jumys basqa aýmaqtarda da júrgizilip otyr. Atap aıtqanda, Mańǵystaý oblysynda birqatar memlekettik uıymdarǵa qatysty júrgizilgen uqsas jumystyń nátıjesinde 60 mln. teńgeden astam somma únemdeldi, onyń ishinde: «Tazalyq» MKK - 5 mln. teńgeden astam; «Kaspıı jylý, sý arnasy» MKK - 19 mln.teńgeden astam; «AMMTP» UK» AQ - 32,5 mln.teńgeden astam; «Kaspıı jylý, sý arnasy» MKK - 3,7 mln.teńgeden astam.
Budan basqa, Halel Dosmuhamedov atyndaǵy Atyraý memlekettik Ýnıversıtetiniń 2013 jylǵa arnalǵan memlekettik satyp alýlardyń jyldyq josparyn saralaý barysynda turǵyn páterlerdi kótermelengen baǵamen satyp alýdyń josparlaný faktileri anyqtaldy. Naqty aıtqanda, 4 bólmeli páterdi 32,2 mln.teńgege (214 667 AQSh dollary), 5 bólmeli páterdi - 37,5 mln.teńge (250 myń AQSh dollary) satyp alý josparlanǵan. Alaıda aqparattyq, elektrondyq jáne merzimdik basylymdarda Atyraý qalasyndaǵy 4 bólmeli páterlerdiń naqty baǵasy 16,5 mln.teńgeden 22,5 mln.teńgede deıingi somany (110-nan 150 myń AQSh dollaryna deıin), 5 bólmeli páterlerdiń - 22,5 mln.teńgeden 27 mln.teńgege deıingi (150-180 myń AQSh dollary) sommany quraıtyndyǵy anyqtaldy. Ýnıversıtettiń jaýapty tulǵalary páterlerdiń naqty baǵalaryn jalpy somasy 20,2 mln. teńgege asyrylýyn túsindire almady, sodan soń atalǵan jyldyq memlekettik satyp alýlar josparyn qaıta qarastyrdy.
