Qarjy polıtsııasy akademııasynyń tyńdaýshylary Bas prokýratýrada ótken dóńgelek ústelge qatysty
ASTANA. Mamyrdyń 5-i. QazAqparat /Zarına Rysbaeva/ - Astanada Qarjy polıtsııasy akademııasynyń tyńdaýshylary - «Jeti-Jarǵy» ǵylymı-teorııalyq úıirme músheleri «Qazirgi ýaqyttaǵy zańdylyqty saqtaýǵa baılanysty ózekti máseleler» taqyrybymen QR Bas prokýratýrasynyń S.Esqaraev atyndaǵy ınstıtýty qabyrǵasynda dóńgelek ústel nysanynda uıymdastyrylǵan is-sharaǵa qatysty. Onda memlekettik-quqyqtyq pánder kafedrasynyń aǵa oqytýshylary D.Jabaev jáne E.Mergenbaev taqyrypqa qatysty sholý jasady, dep habarlaıdy akademııanyń baspasóz hatshysy.
Bólim bastyǵy Narı Shamaeva óz baıandamasynda ınstıtýt qyzmetkerleriniń tolyqqandy jáne jemisti jumys isteýlerine barlyq qajetti jaǵdaıdyń jasalǵanyn, oǵan kýrsanttardyń kózderiniń jetkenin, ıaǵnı, basymdylyq róli memleket pen azamattardyń quqyqtary men múddelerin qorǵaý sezimin týǵyzatynyn, ol ınstıtýttyń keń, ári jaryq qyzmettik bólmeleri, otyrystardy ótkizetin zaly qazirgi kezeńdegi sońǵy úlgidegi tehnıkamen jabdyqtalǵandyǵyn aıtyp ótti.
Aǵa prokýror Rýslan Toqtaǵulov memlekettik organdarǵa degen senim artý qoǵamnyń quqyqtyq mádenıeti men quqyqtyq bilimdiliginiń deńgeıine táýeldi ekenin, Qarjy polıtsııasy akademııasynyń tyńdaýshylary sonyń jas ókilderi ekenin jetkizdi. Sol sebepti, memlekettik organdar ókilderimen mundaı qabyldaýlar men kezdesýler joǵary mádenı tálimdik tárbıege, jalpy jáne saıası mádenıetke, ómirlik qundylyqtardyń qalyptasýyna, sondaı-aq zańı jáne ekonomıkalyq pánderden teorııalyq biliminiń tolyqqandy ıgerilýi men durys qoldanýyna kómektesedi.
Zańdylyqty qadaǵalaý qyzmeti týraly áńgime jáne pikirtalastar tyńdaýshylar arasynda qyzyǵýshylyq týǵyzdy. Tyńdaýshylar osynyń bárin dáristerde meńgerý, oqýlyqtardan ıgerý jáne buqaralyq aqparat betterinen bilýge qaraǵanda, tájirıbe ústinde quqyq normalarynyń qoldanylýyn kórýdiń jóni bólek ekenine kóz jetkizdi.
