Qarjy polıtsııasy akademııasyna qazaq batyry R. Qoshqarbaevtyń esimin berý máselesi áli sheshilmeı keledi -R. Halmuradov
dep habarlaıdy QazAqparat.
«Ekinshi dúnıejúzilik soǵysta jan alysyp, jan berisken, Otan jolynda janyn qurban etken esil erlerdiń erlikteri máńgilik halyq jadynda saqtalary sózsiz. Ýaqyt óte kele surapyl soǵystyń bizge beımálim bop kelgen jaıttary ashylyp, qazaq batyrlarynyń sany burynǵydan da arta túsetinine kúmán joq. Jalpy, qazaqtan shyqqan UOS batyrlarynyń qatarynda keńestik júıe saıasatynyń kesirinen kezinde erligi durys baǵalanbaı, kópshilik arasynda talaı- tartys týdyryp kelgen asyl azamattar kóp. Solardyń biri, Uly Jeńistiń jalaýyn alǵash jelbiretip, Reıhstagqa tý tikken - Raqymjan Qoshqarbaev», dedi saýal barysyna depýtat.
Batyr dúnıeden ótkennen keıin oǵan QR Prezıdentiniń jarlyǵymen Halyq qaharmany ataǵy berildi. Búgingi kúni Aqmola oblysynyń Qosshy aýylyndaǵy orta mektep batyr esimimen atalady. «Degenmen, R. Qoshqarbaevtyń rýhyna taǵzym retinde bundaı dáleldermen shektelip qalýǵa da bolmaıdy. Osy rette, Qarjy polıtsııasy akademııasynyń ujymy, Ekonomıkalyq qylmysqa jáne sybaılas jemqorlyqqa qarsy kúres agenttiginiń jáne jurtshylyqtyń qoldaýymen R. Qoshqarbaevtyń esimin Qarjy polıtsııasy akademııasyna berý týraly bastama kótergen edi, dedi depýtat. Alaıda, R. Halmuradovtyń aıtýynsha, atalǵan másele búgingi kúnge deıin óz sheshimin tappaı keledi.
«R. Qoshqarbaevtaı ulyn urpaqqa dáripteý paryz. Er esimin elge oraltý da paryz. Sondyqtan, Akademııaǵa batyrdyń esimin berýge tireletin kedergilerdi joıyp, oryndy bastamany aıaǵyna deıin atqarý qajet», dedi depýtat.
