Qarjy polıtsııasy agenttiginiń tóraǵasy keıbir aýmaqtyq bólimshelerdi synǵa aldy
ASTANA. 30 shilde. QazAqparat - Qarjy polıtsııasy agenttiginiń tóraǵasy Rashıd Túsipbekov naqty baǵyttar boıynsha jedel qyzmetti qajetti deńgeıde uıymdastyrmaǵany úshin vedomstvonyń keıbir aýmaqtyq bólimsheleriniń jumysyn synǵa aldy.
Bul týraly vedomstvonyń baspasóz qyzmetinen habarlaıdy.
«Bizdiń qyzmetimizde áli de birlesken talqylaý men sheshýdi qajet etetin problemaly tustar bar. Meniń oıymsha, aýmaqtarda jekelegen basym baǵyttar boıynsha jumys sáıkes deńgeıde uıymdastyrylmaǵan», - dedi R. Túsipbekov.
Sybaılas jemqorlyq, paraqorlyq jáne memlekettik baǵdarlamalardy iske asyrýǵa bólingen bıýdjettik qarajatty urlaý faktilerin anyqtaý men áshkereleý boıynsha jumysty durys uıymdastyrmaǵan oblystyq qarjy polıtsııasy bólimsheleri synǵa alyndy.
Oǵan qosa, qaramaǵyndaǵy aýmaqtarda kóleńkeli ekonomıkanyń tómendeýin qamtamasyz etpegen birneshe qarjy polıtsııasy departamentteriniń jetekshilerine eskertýler jasaldy.
Qorytyndylaı kele, vedomstvo basshysy aýmaqtyq departamentterdiń basshylyǵyna Agenttiktiń nusqaýlary men usynystaryn eskere otyryp, óz qyzmetterin jetildirý boıynsha qajetti sharalardy qabyldaýdy tapsyrdy.
Sybaılas jemqorlyq pen ekonomıkalyq qylmystylyqtyń uıymdasqan nysandaryna qarsy turý, memlekettik jáne salaaralyq baǵdarlamalardy, onyń ishinde JIIDB iske asyrýǵa bólingen qarajatty maqsatty jumsaýdy jedel súıemeldeýdi qamtamasyz etý, sondaı-aq kóleńkeli ekonomıkanyń deńgeıin naqty tómendetý basym baǵyttar retinde belgilendi.
Óz qatarlarynyń tazalyǵyn qamtamasyz etý boıynsha R. Túsipbekov Agenttiktiń Іshki qaýipsizdik basqarmasyna qyzmetkerlerdiń arasyndaǵy tártipti kúsheıtýge baǵyttalǵan profılaktıkalyq jumysty kúsheıtýdi tapsyrdy.
Ol jeke quramnan zańnama men qarjy polıtsııasy qyzmetkerleriniń etıka erejelerin qatań saqtaýdy talap etti.
Sondaı-aq, R. Túsipbekov qarjy polıtsııasy men azamattyq qoǵamnyń arasyndaǵy qarym-qatynastarda oń ózgeristerdi atap ótti. Onyń aıtýynsha, sybaılas jemqorlyqtyń aldyn alý máselelerinde turǵyndar men qoǵamnyń qatysýy belsendi sıpatqa ıe boldy.
Soǵan sáıkes, bekitilgen sybaılas jemqorlyqqa qarsy turýǵa járdemdesken tulǵalardy kótermeleý qaǵıdalarynyń sheńberinde 50-den astam tulǵa 4 mln. teńgeden astam somaǵa kótermelendi.
Azamattardyń belsendi kómeginiń arqasynda 70-ten astam qylmystyq is qozǵalyp, 40-tan astam laýazymdy tulǵa sottaldy.
Agenttik tóraǵasy qoǵamdyq uıymdar, saıası partııalar men kásipkerler assotsıatsııalarymen sybaılas jemqorlyq pen kóleńkeli ekonomıkaǵa qarsy turý máseleleri boıynsha ózara is-qımyldy shıratýdy tapsyrdy.
