Qarjy polıtsııasy 3 mlrd. teńgeden astam bıýdjet qarajatyn tıimsiz paıdalanýǵa jol bermedi
ASTANA. 2 qazan. QazAqparat - Qarjy polıtsııasy organdary bıylǵy jyly 3 mlrd. teńgeden astam bıýdjet qarajatyn tıimsiz paıdalanýǵa jol bermedi.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Ekonomıkalyq qylmys jáne sybaılas jemqorlyqqa qarsy kúres agenttigi Aqparattyq-taldaý departamentiniń basshysy Oljas Bektenov aıtty.
«Ahýaldyq ortalyqpen satyp alý baǵalaryn negizsiz joǵarylatý faktilerin anyqtaý úshin memlekettik organdardyń jáne ulttyq kompanııalardyń satyp alý josparlaryna monıtorıng júrgiziledi.
Tapsyrys berýshi jarııalaǵan taýardyń satyp alý quny naryqtyq baǵalarmen salystyrylady jáne joǵarylatý anyqtalǵan jaǵdaıda, biz konkýrsty joıý nemese baǵany tómendetý, sondaı-aq kináli qyzmetkerlerdi jaýapkershilikke tartý týraly usynys engizemiz.
Atalǵan jumystyń oń nátıjeleri de bar. Jyl basynan beri 3 mlrd.teńgeden astam bıýdjet qarajatyn únemsiz paıdalanýǵa jol berilmedi», - dedi departament basshysy.
Onyń sózine qaraǵanda, eń jıi janar-jaǵar maı, tamaq ónimderi, tehnıkany satyp alý kezinde qunyn joǵarylatý faktileri anyqtalady.
