Qarjy polıtsııasy 12,5 mlrd.teńge jymqyrǵan «Azyq-túlik korporatsııasy» UK» AQ burynǵy basqarma tóraǵasyn qamaýǵa aldy
ASTANA. 2 shilde. QazAqparat - 30 mamyrda Qarjy polıtsııasy agenttigi «Azyq-túlik korporatsııasy» UK» AQ laýazymdy tulǵalaryna qatysty qylmystyq is qozǵady.
Olar 2007-2013 jyldar aralyǵynda «BOGVI» kompanııasynyń jáne ózge de astyq kásiporyndarynyń basshylarymen aldyn ala sóz baılasyp, kelisim-shart jasaý jáne bıdaıdy qaıtarymsyz berý arqyly senip tapsyrylǵan múlikti talan-tarajǵa salyp, memleketke 12,5 mlrd.teńgeden astam zalal keltirilgen.
Osy qylmystyq isti tergeý barysynda atalǵan qylmystardy jasaýǵa «Prodkorporatsııa» AQ burynǵy basqarma tóraǵasy B.Qabdrahmanovtyń qatystylyǵy anyqtaldy, dep habarlady Qarjy polıtsııasynyń baspasóz qyzmetinen.
2007-2008 jyldar aralyǵynda «BOGVI» kompanııalar tobyna jáne ózge de astyq kásiporyndaryna ekinshi deńgeıli bankter men Korporatsııanyń enshiles kásiporny «Ekspertnaıa Agrarnaıa Kompanııa» JShS (budan ári - «EkspAgro» JShS) kepildigimen «Azyq-túlik korporatsııasy» AQ kóktemgi egistik jáne jınaý jumystaryn júrgizý úshin jalpy somasy 7 mlrd.teńgege nesıe bergen.
2008-2009 jyldar aralyǵynda Azyq-túlik korporatsııasy joǵaryda kórsetilgen kelisim-sharttar boıynsha mindettemelerdi oryndaý merzimderin uzartý týraly birneshe ret negizsiz sheshimder qabyldaǵan.
2010 jylǵy 1 qańtarda «BOGVI» kompanııalar tobynyń jáne ózge de astyq kásiporyndarynyń Korporatsııa aldyndaǵy qaryzy 10 mlrd.teńgeden astam somany quraǵan. Buǵan qaramastan, Korporatsııanyń laýazymdy tulǵalary 2010 jyldyń aqpan-naýryz aralyǵynda atalǵan kompanııalarmen tólemdi uzartyp, bıdaıdy satý týraly qosymsha kelisim-sharttar jasasqan.
Sonymen birge mindetterdi oryndaý úshin Korporatsııa «EkspAgro» JShS-niń bıdaımen qamtamasyz etilmegen jalǵan bıdaı qolhattaryna negizdelgen kepildemelerin qabyldanǵan.
2011-2012 jyldary aralyǵynda B.Qabdrahmanov Korporatsııa basqarmasynyń tóraǵasy bolǵan kezde, Bıdaı basqarý jónindegi komıteti táýekelder boıynsha saraptamalyq qorytyndysyz «BOGVI» kompanııalar tobynyń jáne ózge de astyq kásiporyndarynyń mindettemelerin oryndaý merzimderin birneshe ret uzartýdy maquldaǵan.
Qazirgi ýaqytta memlekettik bıdaı ınspektorlarynyń aktilerine sáıkes, 2008-2011 jyldar aralyǵynda elevator jáne nan qabyldaý kásiporyndarymen, onyń ishinde «BOGVI» kompanııalarymen de 2,4 mln.tonna bıdaı kóleminde jalǵan bıdaı qolhattary jazylyp berilgendigi anyqtaldy.
Nátıjesinde kelisim-sharttar boıynsha atalǵan kásiporyndardyń qaryzy 12,5 mlrd.teńgeni qurady.
Aǵymdaǵy jylǵy 26 maýsymda Kabdrahmanov ustalyp, 28 maýsymda ol sot sanktsııasymen qamaýǵa alyndy.
Ol talan-tarajǵa salý arqyly 12,5 mlrd.teńge somasynda bıýdjet qarajatyn urlaǵan dep aıyptalýda.
Qylmystyq is tergelýde, osy qylmysty jasaýǵa qatysy bar Azyq-túlik korporatsııasynyń basqa da laýazymdy tulǵalary anyqtalýda.
Tergeý nátıjeleri jurtshylyqqa jetkiziletin bolady.
