Qarjy polıtseıine para bermek bolǵan laýazymdy tulǵa qamaýǵa alyndy
ASTANA. QazAqparat - Ótken jyly qylmystyq jaýapkershilikten jaltarý maqsatynda qarjy polıtseılerine para usyný faktisi boıynsha qarjy polıtsııasy 22 qylmystyq is qozǵady. Bıylǵy jyl bastalmaı jatyp ta ondaı qylmystardyń birnesheýi áshkerelendi, dep habarlaıdy vedomstvonyń baspasóz qyzmetinen.
Aıtalyq, 28 qańtarda Almaty oblysy boıynsha Qarjy polıtsııasy departamentiniń qyzmetkerleri QR Qarjy mınıstrliginiń Almaty oblysy Qazynashylyq departamentiniń basshysy Іrgebaevty ustady. Oǵan Almaty oblysynyń Qurylys basqarmasynyń burynǵy basshysy Serikbaevpen aldyn-ala sóz baılasyp, qarjy polıtsııasynyń laýazymdy tulǵasyna «Jetisý Qala Kurylys» JShS men oblystyq qurylys basqarmasynyń laýazymdy tulǵalaryna qatysty tergeýaldy tekserisi boıynsha jaǵymdy sheshim shyǵarý úshin 900 myń teńge kóleminde para berdi degen aıyp taǵylýda. Іrgebaev pen Serikbaevqa qatysty para berý faktisi boıynsha qylmystyq is qozǵaldy. 31 qańtarda Іrgebaev sot sanktsııasymen qamaýǵa alyndy, Serikbaevtan eshqaıda ketpeý týraly qolhat alyndy. Oǵan qosa, 2014 jylǵy 22 qańtarda Ońtústik Qazaqstan oblysy boıynsha Qarjy polıtsııasy departamenti «Aq Mereke» JShS dırektory A. Qurmanbaıǵa qatysty qylmystyq is qozǵady. Oǵan Tóle bı aýdanynyń Kóksaek aýylyndaǵy aqyl esi kem balalarǵa arnalǵan ınternat ǵımaratyn jóndeý boıynsha tekseristi toqtatý úshin 14 qańtarda qarjy polıtsııasy qyzmetkerine 1 mln.teńge kóleminde para berdi degen kúdik taǵylýda. Qurmanbaı óz kinásin tolyq moıyndady.
