Qarjy pıramıdasynyń negizigi tórt túri bar – agenttik

ALMATY. QazAqparat – Bıyl elimizde qarjy pıramıdasyn qurýǵa qatysty 33 qylmystyq is tirkeldi, dep habarlady QazAqparat tilshisi.

QR Qarjylyq monıtorıng agenttiginiń resmı ókili Álibek Ábdilovtyń aıtýynsha, bıyl barlyǵy 28 qarjy pıramıdasyn uıymdastyrýshylarǵa qatysty Qylmystyq kodekstiń 217-baby boıynsha 33 qylmystyq is tirkeldi.

«Sot 7 qylmystyq isti qarady, olar boıynsha 11 adam sottaldy, onyń ishinde 1 - shet memlekettiń azamatyna qatysty. Barlyq tulǵalarǵa naqty merzimge – 3 jyldan 6 jyl 8 aıǵa deıin bas bostandyǵynan aıyrý jazasy taǵaıyndaldy. Bul rette 7 adam 5 jylǵa bas bostandyǵynan aıyryldy»,- deıdi ol.

Onyń aıtýynsha, qarjy pıramıdasynyń negizi tórt túri bar.

«Búgingi tańda agenttik qarjy pıramıdasynyń negizgi tórt túrin anyqtady. Atap aıtar bolsaq, messendjerlerdegi chattar, ıaǵnı WhatsApp, Telegram arqyly taratyp, qyzmetterin usynyp jatady. Ekinshi, jelilik marketıng. Onyń ishinde túrli bilim kýrstary bar, tipti zergerlik buıymdar satady. Osyndaı jolmen qarjylyq pıramıdasyn ashady. Úshinshi, ınvestıtsııalyq jobalar jáne tórtinshisi tutyný kooperatıvteri»,- dep tolyqtyrdy QR Qarjylyq monıtorıng agenttiginiń resmı ókili Álibek Ábdilov.

Qarjylyq monıtorıng agenttigi azamattardy asa saq bolýǵa jáne olardy qarjylyq pıramıdalarǵa tartatyn alaıaqtardyń aıla-amalyna túspeýge shaqyrady. Buǵan deıin «Innova Gold» qarjy pıramıdasyn uıymdastyrýshylar eki aıǵa qamaýǵa alynǵany týraly jazǵan bolatynbyz.