Qarjy pıramıdasynyń quryltaıshylary Qyrǵyzstan men Reseıde izdestirilýde
NUR-SULTAN. QazAqparat – Qarjy pıramıdasynyń eki quryltaıshysy Reseı men Qyrǵyzstan aýmaǵynda izdestirilýde. Bul týraly Іshki ister mınıstrligi tergeý departamentiniń basshysy Sanjar Ádilov málim etti, dep habarlaıdy QazAqparat tilshisi.
«Negizgi quryltaıshylar, ıaǵnı 12 kúdikti halyqaralyq izdeýge jarııalandy. Ókinishke qaraı, olardyń birazy azamattardyń shyǵymy túskenge deıin Qazaqstan aýmaǵynan tys jerde jasyrynyp úlgergen. Olardy anyqtaý men ustaý boıynsha jedel tergeý toby jumys istep jatyr. Qazirgi kezde 15 kúdikti ustaldy. Kún saıyn qylmystyq jaýapkershilikke tartylatyn kúdiktiler sany artýda», - dedi S. Ádilov Parlament Májilisinde tilshiler saýalyna jaýap bere otyryp.
Onyń sózine qaraǵanda, el turǵyndarynan alynǵan qarjynyń negizgi bóligi qolma-qol aqsha kúıinde jınalǵan.
«Qazir Qarjylyq monıtorıng komıtetimen, Bas prokýratýramen birlese jymqyrylǵan qarjyny izdestirý sharalaryn atqarýdamyz. Búginde izdestirý sharalary barysynda 40 mln teńge tárkilendi. Tergeý organdarymen 21 páterge, 3 úıge, 30-dan astam avtokólikke tyıym salyndy», - dedi Tergeý departamentiniń basshysy.
Sonymen qatar ol Qazaqstan boıynsha 13 óńirde qarjy pıramıdasyna qatysty qylmystyq árketter tirkelgenin naqtylady.
«Keltirilgen jalpy shyǵynnyń somasy 5 mlrd teńgeden astam. Tergeý barysynda jymqyrylǵan ashqa izdestirilip, qaıtarylady. Kúdikti 12 adamnyń ekeýi shetelge qashyp ketken. Arnaıy tergeý toby Reseı men Qyrǵyzstanǵa jiberildi. Tintý barysynda 42 myńnan astam kelisimshart alyndy. Sondyqtan aryz berýshilerdiń sany kún saıyn artady dep oılaımyz», - dedi Sanjar Ádilov.
Eske sala ketsek, QR Іshki ister mınıstrligi qarjy pıramıdalary men lombardtarǵa aldanǵan qazaqstandyqtardan aryz-shaǵymdar áli de túsip jatqanyn málim etken bolatyn.
Salymshylardyń sanyn kóbeıtý úshin kompanııalar Qazaqstan estradasynyń jáne sport salasynyń juldyzdaryn tartyp, aýqymdy jarnama júrgizgen.
«Búginge deıin 2 myńǵa tarta shaǵym tústi. Kompanııalardyń aımaqtardaǵy barlyq keńsesine tintý júrgizilip, birlesken jumys týraly kelisimder, býhgalterlik qujattar, noýtbýk, keńse tehnıkasy, zergerlik buıymdar men ózge de zattar tárkilendi. Tárkilengen qujattarǵa sáıkes kompanııalar 42 myń adammen kelisimge kelgen. Qazirgi esep boıynsha shyǵyn mólsheri 5 mıllıard 411 mıllıon teńge bolyp otyr», - delingen ІІM habarlamasynda.
