Qarjy pıramıdasynan qalaı saqtaný kerek - mınıstrlik
Qarjy mınıstrliginiń Qarjy monıtorıngi komıtetiniń málimetinshe, BQO-da zardap shekkenderdiń 612 mln teńgeden astam qarajatyn qarjy pıramıdasy jınaǵan. Zańsyz qyzmetti uıymdastyrǵan «R.O.I. Club» JShS qyzmetkerlerine qatysty qylmystyq isti tergelip jatyr.
Bes oblysta quny 15 myń teńge nemese odan qymbat «sertıfıkatty» satý arqyly halyqtan aqsha jınaý shemasyn jasap, iske asyrǵan «B2B Jewelry» zergerlik buıymdar dúkenderiniń basshylaryna qatysty is boıynsha Almatyda tergeý júrgizilip jatyr. Osy ýaqytqa deıin 10 myńnan astam zardap shekken adam anyqtalǵan. 250 mıllıon teńgeden astam shyǵyn keltirildi.
Komıtet mamandary qarjylyq pıramıdany qalaı anyqtaýǵa bolatynyn aıtyp, QR Qylmystyq kodeksiniń 217-babyna sáıkes qarjy (ınvestıtsııa) pıramıdasyn qurý jáne basqarýǵa qylmystyq jaýapkershilik qarastyrylǵanyn atap ótti.
Aıta ketý kerek, qarjy pıramıdasyna qosylý erikti túrde jáne zańdy qoldaýsyz júzege asady. Bul degenimiz, eshkim ınvestıtsııanyń qaıtarylýyna kepildik bermeıdi.
Sonymen, Qarjy pıramıdasynyń belgileri qandaı?
Adam sengisiz paıda, ústeme tabys ýáde etiledi. Joǵary tabys keletini jóninde ýáde tek bir ret uıymǵa tartý kezinde oryndalýy múmkin, biraq ary qaraı odan da kóp qarajattan aıyrylyp qalý qaýpi óte joǵary.
Kompanııa shynaıy ekonomıkalyq nemese ınvestıtsııalyq qyzmetpen aınalyspaıdy. Pıramıda ózin taýar, nesıe, týrısttik, qurylys kompanııasy retinde ózin tanystyrady. Alaıda, shyndap kelgende eski salymshynyń barlyq tólemi jańa salymshylardyń jarnasy esebinen tólenedi.
Jobalardyń materıaldyq-quqyqtyq bazasy joq, ıaǵnı, bul kompanııalar jańadan qurylǵan, qarjylyq eseptilikke ıe emes, kelisim jasamaıdy nemese kelisimder tek uıymdastyrýshylardyń paıdasyna kózdep jasalǵan ári Qazaqstan zańnamasyna sáıkes kelmeıdi.
Kompanııanyń qyzmeti tym jan-jaqty, sol arqyly kompanııa aıqyn ári naqty qyzmetiniń joqtyǵyn jasyrady.
Áleýmettik jelidegi belsendi ári mezi qylatyn jarnamasy bolady. Osyndaı jarnamany taratý «Jarnama týraly» zańǵa sáıkes emes bolǵandyqtan, atalmysh zańsyz bıznestiń barlyǵy áleýmettik jeli men messendjerde keńinen taralady.
Qarjy regýlıatory lıtsenzııasynyń bolmaýy. Kez kelgen salym eger syıaqynyń merzimi men mólsherlemesi kórsetilgen bolsa depozıt bolyp sanalady. Halyqtan salym alý úshin QR Ulttyq bankiniń lıtsenzııasy qajet, jáne ol ekinshi deńgeıdegi bankterde bar. «QR ekinshi deńgeıdegi bankterinde ornalastyrylǵan depozıtterge mindetti kepildik berý týraly» QR Zańyna sáıkes bankter halyqpen jumys jasap, salynǵan qarajattyń qaıta berilýine kepildeme beredi. Biraq qarjy pıramıdasynyń uıymdastyrýshylary lıtsenzııany qajet etpeıtindigin málimdeıdi.
«Eger sizde qarjy pıramıdasynyń qyzmetine qatysty bolýyńyz jaıly kúmánińiz bolsa, Komıtetke kelesi senim telefondary arqyly habarlasýdy suraımyz: 8 (7172) 708-478, 8 (7172) 709-920», delingen habarlamada.
