Qarjy pıramıdasyn qurǵandarǵa qylmystyq is qozǵaldy - QR ІІM
ASTANA. QazAqparat - QR Іshki ister mınıstrliginiń tergeý komıteti «Buy Time Incorporated LLP» uıymyna qarjy pıramıdasyn qurý jáne oǵan basshylyq jasaý faktisi boıynsha qylmystyq is qozǵady, dep habarlaıdy QazAqparat.
«QR ІІM Tergeý departamenti «Buy Time Incorporated LLP» kompanııasyna qatysty qarjy pıramıdasyn qurý jáne oǵan basshylyq jasaý faktisi boıynsha tirkelgen qylmystyq isti sotqa deıingi tergep-tekserý sharalaryn júrgizýde. Sotqa deıingi tergep-tekserý barysynda «Buy Time Incorporated LLP» qarjy pıramıdasynyń 2017 jylǵy naýryzdan bastap qarashaǵa deıin respýblıkanyń barlyq aýmaǵynda qysqa merzimde mol tabys tabýǵa ýáde berip, áreket etkeni anyqtaldy», - delingen mınıstrlik taratqan aqparatta.
Qazirgi ýaqytta pıramıda áreketiniń nátıjesinde zardap shekken kýálar men jábirlenýshilerdi anyqtaý jumystary júrgizilýde.
«Osyǵan baılanysty qarjy pıramıdasynan zardap shekken adamdar Tergeý departamentine (Astana qalasy, Táýelsizdik dańǵyly, j.t. 714335, u.t. 87023482619) nemese óz aýmaǵy boıynsha ІІD-ge ótinish bildire alady», - dep atap ótedi vedomstvodan.
