Qarjy pıramıdasyn qurǵan aqmolalyq sottaldy
Aqmola oblystyq sotynyń baspasóz qyzmetiniń málimetinshe, Kókshetaý qalalyq sotynyń úkimimen «Rahımbek Konsaltıng» JShS-niń dırektory azamatsha «D» Qylmystyq kodekstiń 190-baby 4-bóliginiń 2-tarmaǵy, 217-baby 3-bóliginiń 2-tarmaǵy boıynsha kommertsııalyq jáne kommertsııalyq emes uıymdarda basshy laýazymdardy atqarý quqyǵynan 6 jyl merzimge aıyra otyryp, jazasyn ortasha qaýipsiz qylmystyq-atqarý júıesiniń mekemesinde óteýmenen, 6 jyl 8 aıǵa bas bostandyǵynan aıyrýǵa sottaldy. Jábirlenýshilerdiń materıaldyq zalalyn óteý týraly talap aryzdary qanaǵattandyryldy.
«Sotta anyqtalǵandaı, azamatsha «D» Kókshetaý qalasynda qarjy pıramıdasyn uıymdastyryp qurdy, jeńildetilgen sharttarmen múlik satyp alý úshin aqshany tartý arqyly zańsyz tabys alyp turdy. Osy maqsatta «D» esimdi azamat 2016 jyly «Tıimdi turǵyn úı», al 2017 jyly «MANSUR AUTO» tutynýshy kooperatıvterin tirkedi», - dedi vedomstvodan.
2016 jylǵy qazan - 2021 jylǵy maýsym aralyǵynda azamatsha «D» úleskerlerge múlikti tıimdi sharttarmen satyp alýǵa ýáde berip, buryn júgingen salymshylardyń paılyq jarnalaryn keıinirek júgingen salymshylardyń paıdasyna qaıta bólip otyrdy. Klıentterdi tartý maqsatynda ol «OLX» ınternet-saıtynda habarlandyrý jarııalap, bılbordtarda jarnama berip, turǵyn úı men kólik quraldaryn satyp alý boıynsha basqa baǵdarlamalarmen salystyrǵanda kooperatıvterdiń tıimdi baǵdarlamasy týraly málimet taratty. Nátıjesinde oǵan ártúrli óńirlerdiń turǵyndary júgindi.
«Budan ári ol klıenttermen paı jáne kirý jarnasy týraly jalǵan kelisimshart jasady. Úleskerler kooperatıvterden qyzyǵýshylyq týdyratyn múlikti alýǵa úmittenip, kelisim-sharttar jasasyp, kooperatıvtiń shottaryna aqsha aýdardy. Shart jasasý kezinde azamatsha «D» qatysýshylardy múlik 3-6 aı ishinde satyp alynady dep sendirdi. Azamatsha «D» azamattarǵa turǵyn úı jáne ózge de tehnıkany berem dep syltaýymen olardan aqsha qarajatyn alyp, keıinnen olardy óz qalaýy boıynsha paıdalandy. Onyń qylmystyq áreket kezeńinde 22 jábirlenýshige 86,5 mln. teńge jalpy somaǵa asa iri mólsherde zalal keltirildi», - dep tolyqtyrdy sottyń baspasóz qyzmetinen.
Sot úkimi zańdy kúshine engen joq.
