Qarjy pıramıdasy basshylarynyń kópshiligi - shetel azamattary

NUR-SULTAN. QazAqparat – Qarjy pıramıdalary basshylarynyń kópshiligi - shetelde turatyn bóten memleket azamattary. Bul týraly QR ІІM Tergeý departamentiniń bastyǵy Sanjar Ádilov aıtty, dep habarlaıdy QazAqparat tilshisi.

«Qarjy pıramıdalarynyń bir ereksheligi - olardy qurǵan, jetekshilik etetin basshylary shetelde turady jáne shet memleketterdiń azamattary. Osyǵan baılanysty biz halyqaralyq baılanys arnalary arqyly konventsııalarda kózdelgen tártip aıasynda kúdiktilerdiń turǵan jerin anyqtaımyz. Olardyń aktıvteri men sheteldegi shottarynyń, qylmystyq áreket jasaý nátıjesinde satyp alynǵan jyljymaly jáne jyljymaıtyn múlkiniń bar-joǵyn tekseremiz», - dedi Sanjar Ádilov ortalyq kommýnıkatsııalar qyzmetindegi baspasóz máslıhatynda.

Osy rette departament basshysy mysal retinde «Teletrade D. J. Limited» basshylyǵyna qatysty qylmystyq isti alǵa tartty.

«Tergeý aıasynda basqa memleketterdiń (Armenııa, Latvııa, Lıtva, Reseı Federatsııasy jáne t.b.) sheteldik bankterindegi osy kompanııanyń 700 myń AQSh dollaryn jáne 130 myń eýrodan astam qarajat salynǵan bank shottarynyń bar ekeni anyqtaldy. Sondaı-aq, Túrkııadaǵy qonaq úı jáne 3 páter túrindegi aktıvter belgilendi. Іs sotqa jiberildi», - dedi ol.