Qarjy pıramıdasy: Almatylyqtar 300 mln teńgesin qaıtaryp aldy

ALMATY. QazAqparat - «B2B Jewelry qarjy pıramıdasynyń salymshylaryna 300 mıllıon teńge qaıtaryldy. Bul týraly Almaty qalasy boıynsha ekonomıkalyq tergeý departamenti málim etti, dep habarlaıdy QazAqparat tilshisi.

«Búgingi tańda qarjy pıramıdasyna aldanǵan 230 salymshyǵa 300 mln teńge qaıtaryldy. Keltirilgen shyǵyndy óteý jumystary jalǵasýda», - dep habarlady Almaty qalasy boıynsha ekonomıkalyq tergeý departamentiniń baspasóz qyzmeti. Qarjy pıramıdasynan japa shekken salymshylardyń biri almatylyq Aqmaral Asqarova departament qyzmetkerlerine atqarǵan jumystary úshin alǵys bildirdi. Onyń aıtýynsha, 2019 jyly B2B Jewelry kompanııasyna 1,3 mln teńgeden astam ınvestıtsııa salǵan. «Men ekonomıkalyq tergeý departamenti qyzmetkerlerine rahmet aıtamyn. Bizdiń aryzymyzdy qabyldap, aqshamyzdy qaıtaryp alýǵa kómektesti», - deıdi ol. Vedomstvo málimetinshe, 2022 jyly qalada segiz qarjy pıramıdasy joıyldy, bul baǵyttaǵy jumystar áli de jalǵasady.

Buǵan deıin «B2B Jewelry» qarjylyq pıramıdasynyń 197 salymshysyna 123 mıllıon teńge qaıtarylǵan bolatyn.

Byltyr atalǵan qarjy pıramıdasyn uıymdastyrýshy 6 jyl 8 aıǵa bas bostandyǵynan aıyryldy.