Qarjy pıramıdalaryna kiremin dep, qapy qalmańyz - Astana qalalyq prokýratýrasy
ASTANA. 19 qyrkúıek. QazAqparat - Qazaqstandyq zańnamada qarjy pıramıdasy shemalaryn paıdalaný arqyly kásipkerlik qyzmetti júzege asyratyn tulǵalardyń jaýapkershiligi kózdelgen.
Mundaı qyzmet Qazaqstan Respýblıkasy Qylmystyq kodeksiniń 177-babynda (alaıaqtyq) kózdelgen qylmys belgilerine jatady.
Qazaqstan Respýblıkasynyń Azamattyq kodeksinde azamattardy túrli qarjy pıramıdalarynyń aıla-amaldarynan qorǵaý maqsatynda (715-bap) kásipkerlik qyzmet retinde azamattardan qaryz túrinde aqsha tartýǵa tyıym salynady. Bul týraly Astana qalasynyń prokýratýrasy málimdeıdi.
Prokýratýranyń málimetinshe, azamattar men elorda turǵyndaryn shekten tys paıyzdar men bonýstar tóleımiz dep aldaý arqyly olardyń qarajattaryn tartatyn qarjy pıramıdalary jumysy qaıta jandana bastaǵan.
Ádette, qarjy pıramıdasynda qyzyqtyratyn joǵary kiris uzaq ýaqyt boıy jalǵasa bermeıdi, al pıramıda mindettemelerin barlyq qatysýshylarǵa tolyǵymen tóleý múmkin emes. Jańa ınvestorlardyń qarajaty oǵan deıingi qatysýshylarǵa, jarnamaǵa jáne uıymdastyrýshylardyń tabysyn qamtamasyz etýge jumsalady.
«Osyndaı jaǵdaılardyń nátıjesinde jobanyń bankrotqa jáne sońǵy ınvestorlardyń shyǵynǵa ushyraýy - zańdylyq», delingen habarlamady..
Alaıda, atalǵan máseleniń zańnamalyq turǵyda rettelgenine qaramastan, qazirgi kezde qarjy pıramıdalaryn qurý, olardyń qyzmetin túrlendirý jáne jetildirýde jańa úrdister baıqalady.
Sergeı Mavrodıı men onyń seriktesteri qurǵan «MMM-2011: My Mojem Mnogoe!» halyqaralyq qarjy pıramıdasy - osynyń aıǵaǵy. Bul pıramıdanyń erekshiligi - resmı tirkelgen uıymnyń jáne bankte biryńǵaı shottyń bolmaýy. Barlyq aqsha aýdarylymdary qatysýshylardyń arasynda tikeleı júzege asyrylady.
TMD elderinde oǵan qatysýshylar sany shamamen 10-15 mln. adamdy quraıdy. Bul rette, Qazaqstanda «MMM-2011» 20 basshysy (júzdik, myńdyq) anyqtalǵan, onyń 6-aýy Almaty qalasynda jumys isteıdi.
Qazirgi ýaqytta «MMM-2011» júıege qatysýshylardyń barlyǵyna tólemderdi toqtatty, bul is júzinde qarjy pıramıdasynyń kúıregenin aıǵaqtaıdy.
Bul rette, Almaty qalasynyń prokýratýra organdary «MMM-2011» qatysýshylaryna qatysty qylmystyq is qozǵaǵandyǵyn aıta ketken jón..
«Qala turǵyndaryn osy aqparat arqyly qyraǵylyq tanytýǵa, kúmándi operatsııalarǵa qatyspaýǵa shaqyramyz. Qarjy pıramıdasy boıynsha ózderińizge belgili faktiler týraly qala prokýratýrasyna 8 (7172)712486 nómirli telefonǵa habarlaýlaryńyzdy suraımyz:», - deıdi prokýratýradaǵylar.
