Qarjy pıramıdalaryna qatysty Іshki ister mınıstrligi de dabyl qaqty
ASTANA. QazAqparat - Qazaqstannyń Іshki ister mınıstrligi azamattarǵa qarjy alaıaqtarynan saq bolýǵa shaqyrdy, dep habarlaıdy QazAqparat.
«Elimizde qarjy pıramıdasynyń belgileri bar uıymdardyń qyzmeti órship tur. 2016 jyly qarjy pıramıdasyn qurý jáne basqarý faktisi boıynsha 350 qylmystyq is óndiriste bolsa, aǵymdaǵy jyldyń 4 aıynda ǵana olardyń sany 351-ge jetip úlgerdi. Alaıaqtardyń kesirinen onmyńdaǵan qazaqstandyq zardap shekti. Mysaly, Qyzylorda oblysynda Questra Holdings Inc. atty sheteldik kompanııanyń qylmystyq áreketteri áshkere boldy. Ol kompanııa salymshylarmen 30 myń teńge salynǵan jaǵdaıda jarty jylda 40 myń teńge qaıtarylady degen jeleýmen kelisimsharttar qurastyrǵan», - delingen mınıstrliktiń taratqan habarlamasynda.
Onyń aldynda Astanada osyǵan uqsas qylmystyq toptyń alaıaqtyq qyzmetine tosqaýyl qoıylǵan bolatyn. «Respekt» kompanııasynyń quryltaıshysy Ibraev onyń ıeligindegi fırma Brıtanııanyń eń iri «BANK OF KINGDOM» atty bankimen 1000 eýroǵa deıin kepildiksiz ári tómen paıyzdy nesıe berý týraly kelisim jasasqanyn aıtyp, jalǵan prezentatsııalar ótkizip kelgen. Ol oǵan kelgen qarapaıym azamattarmen nesıe shartyn jasasyp, ár adamnan 75 myń teńgeden 7 mıllıon teńgege deıingi somada aldyn ala jarna alǵan, keıin izin de sýytqan. Aldanǵan azamattardyń sany myńnan asyp jyǵyldy. Qylmystyq isti tergeý nátıjeleri boıynsha Ibraev 9 jylǵa bas bostandyǵynan aıyryldy.
«Azamattarǵa qyraǵylyq tanytýdy, az ýaqytta qyrýar paıda ákelemiz dep ýáde etetin uıymdarǵa aqsha salýǵa asyqpaýǵa shaqyramyz», - delingen ІІM-niń habarlamasynda.
