Qarjy pıramıdalary keltirgen shyǵyn ótele me
NUR-SULTAN. QazAqparat – QR ІІM Tergeý departamentiniń basshysy Sanjar Ádilov qarjy pıramıdalary tarapynan keltirilgen shyǵyndy Qazaqstan azamattaryna ótep berýge qatysty túsinik berdi, dep habarlaıdy QazAqparat tilshisi.
«Alaıaqtar áreketinen zardap shekken azamattardy bir ǵana másele alańdatady, ıaǵnı olar keltirilgen shyǵyn qalaı óteletinin suraıdy. Bizdiń qyzmet salymshylardyń urlanǵan aqshalary men aktıvterin anyqtaýǵa, alaıaqtar qylmystyq jolmen jıǵan múlikti anyqtaýǵa, sondaı-aq oǵan der kezinde toqtam salýǵa baǵyttalǵan», - dedi S. Ádilov mınıstrlik uıymdastyrǵan onlaın brıfıngide.
Osy oraıda ol qylmystyq ister sotqa joldanǵannan keıin, keltirilgen shyǵyndy óteýge qatysty másele sotta qaralatynyn eske saldy.
«Árıne, kúdiktilerdiń qylmystyq jolmen jıǵan barlyq múlki sot sheshimimen zardap shekkenderdiń shyǵynyn óteýge baǵyttalady. Osy qadamdarǵa qoldanystaǵy zańnamamen kepildik berilgen», - dedi Sanjar Ádilov.
Budan buryn habarlanǵandaı, departament basshysy «Garant 24 Lombard» isiniń mán-jaıyn aıtyp berdi.
«Garant 24 Lombard» qarjy pıramıdasyn uıymdastyrýshylarǵa qatysty qylmystyq is aıaqtaldy. Osy is boıynsha 18 myńnan astam adam shaǵymdandy, keltirilgen shyǵynnyń jalpy somasy 22 mlrd teńgeden astam. Qylmystyq isti tergeý úshin Іshki ister mınıstrliginiń arnaıy jedel toby quryldy, oǵan 150-den astam qyzmetker endi», - dedi S. Ádilov.
