Qarjy naryǵynyń jumysy tolyǵymen qalpyna keltirildi – Ulttyq bank

NUR-SULTAN. QazAqparat - QR Ulttyq banki tóraǵasynyń orynbasary Álııa Moldabekova eldegi tótenshe jaǵdaı kezinde aqsha jáne valıýta naryǵyndaǵy jaǵdaıdy turaqtandyrý boıynsha UB qabyldaǵan sharalar týraly aıtyp berdi, dep habarlaıdy QazAqparat tilshisi.

«Eldegi jaǵdaı turaqtanǵan alǵashqy kúnnen bastap Ulttyq bank qarjy naryǵynyń qalypty jumys isteýin qalpyna keltirý boıynsha barlyq qajetti sharalardy qabyldady. Birinshiden, 7 qańtardan bastap halyqqa arnalǵan negizgi banktik qyzmetter kezeń-kezeńimen qalpyna keltirildi. Ekinshiden, 10 qańtardan bastap aqsha jáne qor naryqtaryndaǵy operatsııalar qaıta qalpyna keltirildi. Ulttyq Bank ótimdilikti usyný jáne alý boıynsha ekinshi deńgeıli banktermen kún saıynǵy operatsııalardy qaıta bastady. Bank sektorynyń ótimdilik táýekelderiniń aldyn alý maqsatynda Ulttyq bank repo jáne svop naryǵynda ótimdilikti barynsha uzaq merzimge: 7, 30 jáne 90 kúnge usynýǵa kiristi. Budan basqa, jaǵdaıdyń turaqtanýyna qaraı naryqty qolma-qol shetel jáne ulttyq valıýtamen úzdiksiz nyǵaıtý boıynsha jumys júrgizilýde», - dedi Á. Moldabekova.

Úshinshiden, 12 qańtardan bastap valıýta naryǵyndaǵy saýda-sattyq iske qosyldy. Ulttyq bank saýda-sattyq qaıta bastalǵannan keıingi alǵashqy kúnderi shetel valıýtasyna suranystyń artýyn jáne onyń shekteýli usynysyn kútti.

«Sondyqtan, valıýta naryǵynyń ashylýy qarsańynda buryn-sońdy bolmaǵan oqıǵalar aıasynda teńgege alypsatarlyq qysymnyń kórsetilýine jol bermeý maqsatynda valıýtalyq ınterventsııa júrgizýge daıyn ekenimizdi málimdedik. Shynynda da, valıýtalar boıynsha bir aptaǵa jýyq saýda-sattyqtyń bolmaýyn eskere otyryp, bıznes tarapynan, sol sııaqty halyq tarapynan shetel valıýtasyna jınaqtalǵan suranys paıda boldy. Jaǵdaı teńge baǵamynyń budan bylaıǵy qozǵalysy boıynsha oryn alǵan oqıǵalar men belgisizdik aıasynda valıýta satýshylar sanynyń óte shekteýli bolýymen kúrdelene tústi», - dedi UB ókili.