Qarjy naryǵyn retteý agenttigi toılarǵa nesıe berýdi retteý týraly suraqqa jaýap berdi

ASTANA. QazAqparat - Qazirgi kezde qaryz alýshynyń tólem merzimi ótken nesıeleri bolǵan jaǵdaıda, olarǵa bankter men mıkroqarjy uıymdarynan taǵy nesıe alýǵa tyıym salýdy eskeretin zańnamalyq normalar pysyqtalyp jatyr. Bul týraly QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov aıtty, dep habarlaıdy QazAqparat tilshisi.

Búgin Senatta tilshiler agenttik ókiline toı ótkizýge nesıe berý máselesin retteýge qatysty suraq qoıdy.

Óz kezeginde E. Qızatov mundaı is-qımyldar banktiń ishki qyzmetine aralasý bolyp sanalatynyn aıtty.

«Bul turǵyda biz nesıeniń belgili bir túrlerin berýge tyıym sala almaımyz. Qazirgi kezde qaryz alýshynyń tólem merzimi ótken nesıeleri bolǵan jaǵdaıda, bankter men mıkroqarjy uıymdaryna osy adamdarǵa taǵy nesıe berýge tyıym salýdy eskeretin zańnamalyq normalar pysyqtalyp jatyr. Osy rette ýaqytsha qarjylaı qıyndyqtarǵa tap bolǵan jeke adamdardyń qaryz júktemesiniń ósýin shekteı alamyz. Biraq nesıeniń naqty túrlerin zańmen shekteýge quqyǵymyz joq. Bul banktiń ishki saıasaty, oǵan aralasýǵa quqyǵymyz joq», - dedi ol.