Qarjy naryǵyn retteý agenttigi shaǵyn bıznesti qoldaý tártibin bekitti

NUR-SULTAN. QazAqparat - Tótenshe jaǵdaı kezinde qarjylyq jaǵdaıy nasharlaǵan shaǵyn jáne orta kásipkerlik sýbektilerine qoldaý kórsetý, ekonomıkany qalpyna keltirý jónindegi josparlardy iske asyrý maqsatynda ShOB sýbektilerine qosymsha qoldaý kórsetý tártibi bekitildi, dep habarlaıdy QR Qarjy naryǵyn retteý jáne damytý agenttigi.

ShOB sýbektilerine qoldaý kórsetý tártibi ekinshi deńgeıdegi bankterge, bank operatsııalarynyń jekelegen túrlerin júzege asyratyn uıymdarǵa, mıkroqarjylyq qyzmetti júzege asyratyn uıymdarǵa, onyń ishinde buryn kórsetilgen uıymdar bolyp tabylǵan zańdy tulǵalarǵa (kredıttik uıymdar) qoldanylady.

Kredıttik uıym jeke tártippen ShOB sýbektisiniń qarjylyq jaǵdaıyn, tótenshe jaǵdaıdyń jáne karantınniń kásipkerlik qyzmetke áserin jáne ShOB sýbektisiniń qarjylyq jaǵdaıynyń qalpyna kelý perspektıvalaryn baǵalaıdy.

ShOB sýbektileriniń qarjylyq jaǵdaıy nasharlaýynyń obektıvti sebepteri bolǵan kezde kredıttik uıymdar kásipkerlik sýbektilerine qoldaý kórsetýdiń memlekettik baǵdarlamalary sheńberinde banktik qaryzdy jáne mıkrokredıtti jeńildik berilgen talaptarmen qaıta qarjylandyrý jáne (nemese) kórsetilgen sharttar boıynsha tólemderdi ShOK sýbektileriniń qarjylyq jaǵdaıyn jáne tólemge qabilettiligin qalpyna keltirý úshin jetkilikti kezeńge keıinge qaldyrý túrinde qoldaý sharalaryn usynady.

Kredıttik uıym qoldaýdy ShOB sýbektisiniń ótinishi jáne 2020 jylǵy 16 maýsym – 15 qyrkúıek aralyǵynda kredıttik uıymǵa berilgen ShOB sýbektisiniń qarjylyq jaǵdaıynyń nasharlaǵanyn rastaıtyn qujattar negizinde kórsetedi.