Qarjy naryǵyn retteý agenttigi búkil qarjy sektoryn keshendi saýyqtyrýdy qamtamasyz etýi qajet - Prezıdent

NUR-SULTAN. QazAqparat - Qarjy naryǵyn retteý agenttigi búkil qarjy sektoryn keshendi saýyqtyrýdy qamtamasyz etýi qajet. Bul týraly Úkimettiń keńeıtilgen otyrysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Ótken jyly aktıvterdiń sapasyna sholý aıaqtaldy. Qazirgi ahýlaǵa qatysty tolyqqandy jáne shynaıy kartına alyndy. Endigi basty mindet - qarjylyq turaqtylyqty qamtamasyz etý. Bank júıesin saýyqtyrý boıynsha ádister jasaý qajet. Muny keıinge qaldyrmaı shuǵyl júzege asyrý kerek. Olaı bolmaǵan jaǵdaıda saldary kúrdeli boýy yqtımal», - dedi Memleket basshysy.

QR Prezıdenti bankterdi qoldaý máselesin bıýdjet qarajatynsyz naryqtyq sharttarmen qarastyrý qajettigin eskertti.

«Ulttyq bank pen agenttik (Qarjy naryǵyn retteý agenttigi) qarjy júıesiniń turaqtylyǵy men jalpy ekonomıkalyq damý qajettiligi arasyndaǵy balansty tabýy kerek. Memleket paıyzdyq stavkany sýbsıdııalaýǵa jáne kepildendirýge aıtarlyqtaı qarajat salady. Alaıda bul sharalar kásiporyndardyń kópshiligin qamtymaıdy, teńsiz básekelestik týyndaıdy, naryqtyq sharttar burmalanady jáne týrasyn aıtqanda ekonomıkadaǵy qurylymdyq ózgeris oryn almaıdy. Agenttik saqtandyrý qyzmetteri, jańa qarjylyq tehnologııalar, qundy qaǵazdar naryǵyn qosa alǵanda búkil qarjy sektoryn keshendi saýyqtyrýdy qamtamasyz etýi qajet»,- dedi Q.Toqaev.