Qarjy naryǵyn retteý agenttigi alaıaqtarǵa aldanbas úshin ne isteý kerektigin aıtty
Agenttiktiń baspasóz qyzmetinde málimdegendeı, qazaqstandyqtar ózderin Qazaqstanda jáne odan tysqary jerlerde jumys isteıtin qarjy uıymdarynyń qyzmetkerleri retinde tanystyratyn alaıaqtarǵa tap bolýda.
Alaıaqtardyń kópshiligi WhatsApp, Telegram, áleýmettik jeliler, elektrondyq poshta arqyly áreket etedi, «sýyq» qońyraýlar paıdalanady. Bul rette qylmyskerler ózderin ınvestıtsııalyq kompanııalardyń qyzmetkerleri retinde tanystyryp, baǵaly qaǵazdarǵa aqsha salýdy usynady.
Alaıaqtar áleýetti qurbanyna joǵary ınvestıtsııalyq kiris, konsýltatsııalar alýǵa, ilespe qyzmetter kórsetýge ýáde etedi, ol úshin jalǵan brokerlik shottarǵa túrli soma aýdarýdy ótinedi.
Aqsha aýdarylǵan soń, alaıaqtar klıent óz qarajatyn ishinara nemese tolyǵymen alǵysy kelgen sátke deıin onymen yntymaqtasa jumys isteıdi.
Odan soń ádette «salymshylardyń» jalǵan brokerlermen qarym-qatynas ornatýynda qıyndyqtar týyndaı bastaıdy, tipti kóptegen jaǵdaılarda alaıaqtar aldyńǵy salynǵan qarajatty tolyq alý úshin qosymsha soma salýdy talap etedi.
Agenttik retteýshiniń lıtsenzııasy joq kompanııalarmen sharttar jasasyp, ózara is-qımyl jasaý kezinde klıentter barlyq bolýy múmkin táýekeldi ózderi qabyldaıtynyn atap ótedi.
Osyǵan oraı, jeke múlkin saqtaý úshin agenttik qazaqstandyqtarǵa mynadaı qarapaıym erejelerdi basshylyqqa alýǵa keńes beredi:
1. Qazaqstan aýmaǵynda brokerlik qyzmetti jáne ınvestıtsııalyq portfeldi basqarý qyzmetin lıtsenzııasy bar sýbektiler ǵana júzege asyra alady. Kompanııada lıtsenzııanyń bolýyn Qarjy naryǵyn retteý jáne damytý agenttiginiń resmı saıtynan tekserýge bolady.
2. Sonymen birge ókilder silteme jasaıtyn saıtqa nemese ınvestıtsııalyq kompanııanyń qosymshasyna kirip, barlyq ornalastyrylǵan aqparatty, onyń ishinde qarjylyq eseptilikti, ýákiletti organnyń lıtsenzııasyn, úlgilik shartty, sondaı-aq, basqa da ilespe qujattar men aqparatty muqııat zerdeleý qajet. Qajet bolǵan jaǵdaıda, ózara is-áreket yqtımal alaıaqpen emes, kásibı qatysýshymen júzege asyrylatynyna kóz jetkizý úshin resmı resýrsta kórsetilgen baılanys derektemelerine qońyraý shalý kerek.
3. Jarnamaǵa árdaıym saqtyqpen qaraý qajet: BAQ-taǵy, ınternet-resýrstardaǵy, onyń ishinde áleýmettik jelilerdegi joǵary kiristilikke ýáde etken, shamadan tys jarnama kóbine alaıaqtyq bolyp tabylady. Baǵaly qaǵazdar naryǵyndaǵy lıtsenzııalanǵan kásibı qatysýshylarǵa joǵary kiristilikke ne ınvestıtsııalaýdan shyǵyn bolmaıtynyna kepildik berýge tyıym salynady.
4. Árqashan derekterdi qaıta tekserińiz, áli kórsetilmegen qyzmet nemese alynbaǵan taýar úshin tólem jasamańyz, belgisiz shottar men telefon nómirlerine aqsha aýdarmańyz, ınternet jelisindegi kúdikti siltemelerge ótpeńiz jáne banktik kartalaryńyzdyń derekterin habarlamańyz.
«Osyndaı kompanııalardyń is-áreketine aryz-shaǵymdardyń jıilep ketkenin eskere otyryp, olar týraly aqparat quqyq qorǵaý organdarynyń nazaryna jedel jetkiziledi. Budan basqa, agenttik Qazaqstan aýmaǵynda osyndaı kompanııalardyń saıttaryn buǵattaý múmkindigi týraly Aqparat jáne qoǵamdyq damý mınıstrligine hat jiberip otyrady. Qarapaıym erejelerdi saqtaý qarjylyq shyǵyndardy, negizsiz táýekelderdi, sondaı-aq, jeke aqparat jarııa bolmaıdy»,- dedi Agenttiktiń baspasóz qyzmetinde.
