Qarjy mınıstrliginiń qyzmetkerleri memlekettik serverlerdi krıptovalıýta maınıngi úshin paıdalanǵan - UQK
«Qazirgi ýaqytta Qazaqstan Respýblıkasynyń Ulttyq qaýipsizdik komıteti aldyn ala tergeý sheńberinde Qazaqstan Respýblıkasy Qarjy mınıstrligi Memlekettik kirister komıtetiniń Qaraǵandy, Atyraý, Aqtóbe jáne Soltústik Qazaqstan oblystary boıynsha departamentterindegi memlekettik aqparattyq júıelerdiń serverlerinde krıptovalıýtalar óndirý (maınıng dep atalatyn) faktileri boıynsha QR Qylmystyq kodeksiniń 207-baby (Aqparattyq júıeniń nemese telekommýnıkatsııalyq jeliniń jumysyn qasaqana buzý) jáne 210-baby (Zııandy kompıýterlik baǵdarlamalar men baǵdarlamalyq ónimderdi jasaý, paıdalaný nemese taratý) boıynsha qylmystyq isterdi tergeýde» delingen habarlamada.
Málimetter boıynsha, zańǵa qaıshy áreketti Qazaqstan Respýblıkasy Qarjy mınıstrliginiń Memlekettik kirister komıteti aqparattyq bólimsheleriniń qyzmetkerleri júzege asyrǵan. Krıptovalıýtalar maınıngine departamentterdiń ózderiniń, olardyń aýdandyq bólimsheleriniń aqparattyq júıeleriniń serverleri, sondaı-aq qyzmetkerlerdiń anaǵurlym ónimdi qyzmettik kompıýterleri qoldanylǵan.
«Ol úshin serverler men kompıýterlerge esepteýish resýrstardy paıdalanatyn arnaıy baǵdarlamalar (maınerler) jasyryn ornatylǵan, ol aqparatty óńdeý jyldamdyǵyn tómendetken jáne olardyń jumysyn baıaýlatýǵa ákep soqqan. Osy baǵdarlamalar júıelik qyzmetter túrinde ornatylyp, vırýsqa qarsy aıryqsha baǵdarlamalar tizimderine engizilgen» delingen QR UQK baspasóz qyzmeti joldaǵan habarlamada.
Foto: russianworldnews.ru
