Qarjy mınıstrliginiń Kedendik baqylaý komıteti «Qorǵas» keden beketi arqyly ótetin kólikter sanyn eki esege arttyrmaq
ASTANA. 12 sáýir. QazAqparat /Aıdar Ospanalıev/ - Qarjy mınıstrliginiń Kedendik baqylaý komıteti «Qorǵas» keden beketi arqyly ótetin kólikter sanyn eki esege arttyrmaq. Bul másele jóninde atalmysh komıtet tóraǵasynyń orynbasary Ómirzaq Beıisbekov jýrnalıstermen bolǵan brıfıngten soń aıtty.
Onyń sózine qaraǵanda, 1 sáýirden bastap, «Qorǵas» keden beketiniń jumysy jańasha tártippen júrgizile bastady. Buryndary atalmysh kedendik beket qyzmetin tańǵy 9-00-den bastalyp, keshki 18-00-ge deıin júrgizetin. «Tańǵy saǵat 9-00-de «Qorǵas» keden beketimen shekaralas Qytaı eliniń de keden qyzmetkerleri jumys isteı bastaıdy. Al shetten keletin júk kólikterdi osy Qytaı eliniń kedendik jáne ózge de memlekettik rásimdeý sharalaryn júzege asyryp bitkenshe, tús aýady. Odan soń eki eldiń de keden qyzmetkerleri tústik asyn ishýge ketedi. Keden qyzmetkerleriniń tústik astaryn ishýlerine Qytaıda da Qazaqstanda da 1,5 saǵat bólingen. Sóıtip as ishýge barlyǵy
3 saǵat ýaqyt ketedi. Budan soń Qytaıdan taýarlaryn rásimdep bitirgen kólikter Qazaqstan aımaǵyna kelgenshe kesh batady. Nátıjesinde kólikter taýarlaryn bir kún ishinde rásimdep bite almaıdy», -dedi komıtet tóraǵasynyń orynbasary.
Onyń sózine qaraǵanda, elimizdiń kásipkerleri «Qorǵas» kedendik beketinde osy tektes ońtaılandyrý sharasyn uıymdastyrýdy burynnan beri ótinip júrgen. «Osyǵan baılanysty biz Qytaı tarapymen osy máselege baılanysty 3 jyl kólissózder júrgizip, aqyry ony iske asyrýǵa qol jetkizdik»,-dedi Ó.Beıisbekov.
