Qarjy mınıstrliginiń kameralyq baqylaýy zań buzýshylyqtardyń aldyn alady
ASTANA. QazAqparat - QR Qarjy mınıstrliginiń kameralyq baqylaýy memlekettik satyp alýlar júrgizý kezinde zań buzýshylyqtardyń aldyn alady. Bul týraly búgin Parlament Senatynda memlekettik aýdıt jáne qarjylyq qadaǵalaý máseleleri boıynsha dóńgelek ústelde QR Qarjy vıtse-mınıstri Rýslan Beketaev málim etti, dep habarlaıdy QazAqparat.
«Postkeńestik keńistiktegi elderge qaraǵanda Qazaqstanda ǵana satyp alýlardyń memlekettik alańy jumys isteýde. Onda satyp alýlardyń barlyq túrleri boıynsha rásimderdiń 100 paıyzy tek elektrondy túrde iske asyrylady»,-dep toqtaldy ol.
Onyń sózine qaraǵanda, búginde júıe 100 paıyz deńgeıde avtomattandyrylǵan. «Elektrondy Qarjy mınıstrligi» júıesi satyp alýlar portalyna yqpaldasqan, bul óz kezeginde kameralyq baqylaý júıesin engizýge múmkindik berdi. Osy oraıda aýdıttiń tıisti rásimderi júzege asyrylady.
Kameralyq baqylaý kelisimshart bekitkenge deıin buzýshylyqtardy erte kezeńde anyqtaýǵa múmkindik beredi eken.
«Aǵymdaǵy jyldyń alǵashqy 3 aıynda kameralyq baqylaý nátıjesi boıynsha árbir úshinshi konkýrsta zań buzýshylyq anyqtalyp otyrdy. Bul rette 17 myńǵa jýyq konkýrstyq rásimder zań buzýshylaqtarmen ótkizildi. Búginde túsindirý jumystarynyń arqasynda bundaı teris áreketter sany azaıyp, endi árbir besinshi jaǵdaıda buzýshylyqtardy taýyp otyrmyz»,-dedi Beketaev.
Onyń sózine qaraǵanda, kameralyq baqylaý zań buzýshylyqtardy eskertýge baǵyttalǵan. Olar der kezinde anyqtalǵanda, aýdıt nysanynyń laýazymdy tulǵalary jaýapkershilikten bosatylady.
2016 jyldyń 11 aıynyń qorytyndysy boıynsha buzýshylyqtardy ýaqytyly joıǵany úshin jaýapkershilikten 15 myńǵa jýyq laýazymdy adam bosady. Ótken jyly 9 myńnan astam memlekettik qyzmetker jaýapqa tartylǵan kórinedi.
