Qarjy mınıstrliginiń eń birinshi maqsaty – áleýmettik mindettemelerdi ýaqtyly oryndaý - Smaıylov

ASTANA. QazAqparat – Qarjy mınıstrligi úshin bıýdjettiń kiris bóligin arttyrý mańyzdy mindettiń biri bolyp qala beredi. QR Premer-Mınıstri Álıhan Smaıylov Qarjy vedomstvonyń keńeıtilgen alqa májilisinde osyndaı mindetter qoıdy, dep habarlaıdy QazAqparat tilshisi.

«Mınıstrliktiń eń birinshi maqsaty – halyq aldyndaǵy áleýmettik mindettemelerdi ýaqytyly oryndaý.

Memlekettiń shyǵystary jyl saıyn ósip keledi. Biraq, soǵan qaramastan bıýdjettiń kiris bóligin arttyrý Mınıstrlik jumysynyń basty basymdyǵy bolyp qala beredi.

Salyqtar men kedendik bajdardyń jınalýyn arttyrý jáne salyq salynatyn bazany keńeıtý úshin túbegeıli sharalar qabyldaý qajet.

Salyq tóleýshiler men salyq organdarynyń ózara qarym-qatynasy tsıfrlandyrý arqyly servıstik model negizinde qurylýy tıis», - dedi ol.

Sondaı-aq, ol salyq jáne keden júıeleriniń ıntegratsııasyn tolyqtaı iske asyrý qajettigin atady.

«Bir tereze» qaǵıdaty boıynsha engiziletin kedendik baqylaý bıznes-qoǵamdastyqqa oń áser etýi tıis. Jalpy, jańa Salyq kodeksin ázirleý sheńberinde salyqtyq-kedendik ákimshilendirýdi jańartýdy «Atameken» palatasymen jáne sarapshylarmen birge ózara tyǵyz is-qımylda qamtamasyz etý qajet», - dedi Úkimet basshysy.