Qarjy mınıstrliginiń aınalystaǵy baǵaly qaǵazdarynyń kólemi 57,9 paıyzǵa ulǵaıdy
ALMATY. Qańtardyń 13-i. QazAqparat /Erlik Erjanuly/ - Qarjy mınıstrliginiń aınalystaǵy memlekettik baǵaly qaǵazdarynyń jáne Ulttyq banktiń qysqa merzimdi notalarynyń kólemi qańtardyń 1-indegi kórsetkish boıynsha 1761,5 mıllıard teńgeni qurady.
Ony Ulttyq bank tóraǵasy búgin Almatyda ótkizgen baspasóz máslıhatynda málimdedi, dep habarlaıdy QazAqparat.
Grıgorıı Marchenkonyń aıtýynsha, Qarjy mınıstrligi byltyr 707,8 mıllıard teńgeniń memlekettik baǵaly qaǵazdaryn ornalastyrýdy júzege asyrdy. Bul 2008 jylmen salystyrǵanda 51,7 paıyzǵa artyq. 2009 jyly Qarjy mınıstrliginiń memlekettik baǵaly qaǵazdary boıynsha 67 aýktsıony ótti. Onda - 6, 9, 12 aılyq MEKKAM; 2, 3 jyldyq MAOKAM; 2, 3, 4, 5 jyldyq MEOKAM; 6, 7, 8, 9, 10, 11, 13, 15 jyldyq MEÝKAM; 10, 13, 14, 15, 16, 17, 18 jáne 19 jyldyq MEÝJKAM ornalastyryldy. Sonyń nátıjesinde Qarjy mınıstrliginiń aınalystaǵy baǵaly qaǵazdarynyń kólemi ótken jyly 57,9 paıyzǵa ósip, 1288,2 mıllıard teńgege deıin ulǵaıdy. Ulttyq banktiń qysqa merzimdi notalary emıssııasynyń kólemi 1446,5 mıllıard teńge boldy. Bul 2008 jylmen salystyrǵanda 2 ese az. Notalar boıynsha tıimdi kiristilik 6,29 paıyzdan 3,24 paıyzǵa deıin tómendedi.
