Qarjy mınıstrliginde kapıtaldyń shetelge jylystaýymen kúresetin vedomstvo qurylady

ASTANA. QazAqparat - Qarjy mınıstrliginiń eki vedomstvosynyń birigýi arqyly qurylatyn jańa organ kapıtaldyń shetelge shyǵarylýyna jol bermeýmen aınalysady. Bul týraly búgin Úkimet úıinde ótken baspasóz máslıhatynda QR Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Taıaý ýaqytta Qarjy mınıstrliginiń Ekonomıkalyq tergeý qyzmeti Qarjy monıtorıngi komıtetine ótý nátıjesinde qaıta uıymdastyrylatyn bolady. Bul turǵyda tıisti zańnamalyq baza qabyldanyp ta qoıdy. Qazirgi tańda tıisti zańnamalyq aktilerdi qabyldaý sharalary júrgizilýde», - dedi mınıstr.

Onyń aıtýynsha, jańartylǵan ekonomıkalyq tergeý qyzmetiniń jumysy barlyq qoljetimdi aqparat kózderinen, onyń ishinde bankterden jáne basqa uıymdardan derekterdi óńdeý arqyly saraptamalyq jáne IT-quraýyshtardy kúsheıtýge baǵyttalady.

«Qarjylyq qylmystardyń aldyn alýǵa, oryn alǵan jaǵdaılar men sebepterdi anyqtaýǵa, kapıtaldy shetelge zańsyz shyǵarýdyń jolyn kesýge jáne kóleńkeli ekonomıkaǵa qarsy kúres jumystaryna ekpin berilmek», - dedi ol.