Qarjy mınıstrliginde «Adaldyq alańy» jobalyq keńsesi ashyldy
Jobalyq keńse jumysynyń bastalýyna uıytqy bolatyn qujatty búgin QR Qarjy mınıstrliginiń jaýapty hatshysy Erulan Jamaýbaev pen Sybaılas jemqorlyqqa qarsy qyzmet basshysynyń mindetin ýaqytsha atqarýshy Shyńǵys Qabdýlla rásimdedi.
«QR Jemqorlyqqa qarsy is-qımyl agenttigimen birlesip, Qarjy mınıstrliginiń alańynda «Adaldyq alańy» jobalyq keńsesin ashyp otyrmyz. Bul jobanyń negizgi maqsaty - jemqorlyqpen kúres, mınıstrlik qyzmetkerleri arasyndaǵy jemqorlyqty joıý, jemqorlyqqa qarsy mádenıetti qalyptastyrý, halyqtyń senimin arttyrý», - dedi vedomstvonyń jaýapty hatshysy.
Onyń aıtýynsha, keńsede 6 adam jumys isteıdi. Olar azamattardyń shaǵymdaryn, mınıstrlik jumysyna qatysty usynystaryn qabyldap otyrady. Qajet bolǵan jaǵdaıda mınıstrlik basshysy kelýshi azamattarmen kezdesip, kóterilgen máseleni sheshýge qol ushyn beretin bolady.
Al Shyńǵys Qabdýlla atap ótkendeı, «Adaldyq alańy» jobalyq keńsesi barlyq memlekettik organdarda ashylady.
«Kedergisiz mundaı keńse ashqany úshin mınıstrlik basshylyǵyna rızashylyǵymyzdy bildiremiz. Bul jerge kez kelgen turǵyn, kez kelgen ótinim berýshi emin-erkin kele alady. Osy jerde mınıstrlik qyzmetine qatysty ótinimder men shaǵymdar qabyldanady», - dedi ol.
