Qarjy mınıstrligi jekeshelendirý jumystaryndaǵy kemshilikterdi synǵa aldy

ASTANA. QazAqparat - QR Qarjy mınıstrligi 2016-2020 jyldarǵa qurylǵan Keshendi jekeshelendirý josparynyń oryndalýynda birqatar tártip buzýshylyqtar bar ekendigin málimdedi, dep habarlaıdy «QazAqparat» HAA tilshisi vedomstvonyń baspasóz qyzmetine silteme jasap.

Jýyqta ótken Úkimet otyrysynda QR Premer-Mınıstri Baqytjan Saǵyntaev qarjy mınıstri Baqyt Sultanovqa jekeshelendirý tártibin buzǵandar týraly málimetti kópshilikke jarııalaý týraly tapsyrma bergen.

QR Qarjy mınıstrliginiń aqparatyna súıensek, saýda ótkizý sharalary barysynda tártip buzýshylyq Atyraý, Jambyl, Mańǵystaý, Qostanaı, ShQO jáne Almaty oblystarynda «Esil», «Aqtóbe», «Taraz», «Shymkent» jáne «Astana» ÁKK-lerinde tirkelgen.

Vedomstvonyń málimetinshe, 12 nysan boıynsha satý aldy daıyndyq jáne baǵalaý jumystary sozylyp ketken. Bes nysan memlekettik úlesti bólshekteý jolymen satylǵan. «Qazir mınıstrlik qalǵan nysandardyń memlekettik úlesterin májbúrlep satý jumystaryn júrgizýde», - dep habarlady mınıstrlik.

Jekeshelendirý jumystarynda tártip buzý jaǵdaılary baıqalǵan nysandar mynalar: «Tobyl fýtbol klýby» JShS, «Almaty qalasy mamandandyrylǵan salt-joralǵylyq qyzmetter kombınaty» JShS,  «Mańǵystaý oblysynyń óńirlik memlekettik-jeke menshik áriptestik ortalyǵy» AQ jáne basqa da nysandar.