Qarjy mınıstrligi shet elderden 340 qazaqstandyqqa qatysty aqparat suratyp jatyr

NUR-SULTAN. QazAqparat – Qarjy mınıstrligi birneshe shet memleketten qolma-qol shetel valıýtasyn deklaratsııalaǵan 340 qazaqstandyq týraly aqparatqa suraý jiberdi, dep habarlaıdy QazAqparat tilshisi.

«Qarjy mınıstrligi Eýropalyq Odaqqa, Túrkııaǵa jáne BAÁ-ge atalǵan elderdiń kedendik aýmaǵyna kirý kezinde qolma-qol shetel valıýtasyn deklaratsııalaǵan shamamen 340 Qazaqstan rezıdenti boıynsha aqparat berý týraly suraý jiberdi», - dep málim etti Ekonomıkalyq resýrstardyń zańsyz shoǵyrlanýyna qarsy is-qımyl máseleleri jónindegi vedomstvoaralyq komıssııa.

Sonymen qatar komıssııa rezonans týdyrǵan isterdi tergeý barysyndaǵy halyqaralyq yntymaqtastyq aıasynda atqaryp jatqan jumys nátıjelerin baıandady.

«Bas prokýratýra tergep-tekserý organdaryna urlanǵan aktıvterdi shetelden qaıtarý boıynsha qadamdyq algorıtmder, ádistemeler men suraý salý úlgilerin daıyndady. Árbir is boıynsha aktıvterdi qaıtarý strategııasy ázirlenýde, qatar qarjylyq tergep-tekserýler – «Aqshanyń izine tús» tujyrymdamasy iske asyrylýda. Aktıvterge tyıym salý, toqtatyp qoıý maqsatynda jedel sharalar qabyldanýda. Ol úshin «Carin» (Eýropa) jáne «Arin AP» (Azııa jáne Tynyq muhıty aımaǵy) sheteldik aqparat almasý jelileri paıdalanylady. Budan bólek, Bas prokýratýra Dúnıejúzilik banktiń jáne BUU-nyń Esirtki jáne qylmys jónindegi basqarmasynyń Urlanǵan aktıvterdi qaıtarý jónindegi bastamasymen yntymaqtastyq ornatty», - delingen komıssııa habarlamasynda.

Aıta keteıik, bul ýaqytqa deıin qazaqstandyqtar endi aktıvterdi qaıtarý komıssııasyna usynys joldaı alatynyn jazǵan edik .