Qarjy mınıstrligi ortalyqtandyrylǵan satyp alý organdaryn qurýdy usyndy
ASTANA. QazAqparat - Respýblıkalyq, oblystyq jáne aýdandyq deńgeılerde ortalyqtandyrylǵan satyp alý organdaryn qurý josparlanyp otyr.
Bul týraly «Qazaqstan Respýblıkasynyń keıbir zańnamalyq aktilerine memlekettik satyp alý jáne kvazımemlekettik sektor sýbektileriniń satyp alýy máseleleri boıynsha ózgerister men tolyqtyrýlar engizý týraly» zań jobasynyń tujyrymdamasyn tanystyrǵan Qarjy mınıstrliginiń jaýapty hatshysy Baýyrjan Tortaev málim etti, dep habarlaıdy QazAqparat.
«Satyp alýlardy ortalyqtandyrý boıynsha tıisti model usynylyp otyr. Osy oraıda respýblıkalyq, oblystyq jáne aýdandyq deńgeılerde ortalyqtandyrylǵan satyp alý organdaryn qurý usynylýda. Respýblıkalyq deńgeıde bul Qarjy mınıstrliginiń Memlekettik satyp alý komıtetimen qamtylady. Ol óz kezeginde ortalyq memlekettik organdar úshin taýarlar, jumystar men qyzmetter tizimi boıynsha satyp alýlar júrgizedi. Oblystyq deńgeıde ortalyqtandyrylǵan satyp alý organdary ákimdikterdiń memlekettik satyp alý basqarmalarynyń bazasynda qurylady. Olar barlyq oblystarda jumys isteýde. Tizimge qurylys, jóndeý jumystary, jobalaý sharalary, sondaı-aq keńselik taýarlar men jabdyqtar engiziledi»,-dedi Tortaev.
Onyń sózine qaraǵanda, aýdandyq deńgeıde ortalyqtandyrylǵan organdar ákimdik janynda memlekettik satyp alýlar bólimi túrinde qurylmaq. Olar standartty taýarlar kirgen tizim boıynsha satyp alýlar júrgizedi. Joǵaryda atalǵan deńgeılerdiń barlyǵy úshin taýarlar tizimi júrgizilgen taldaý negizinde Qarjy mınıstrligimen anyqtalady.
Osy arqyly ortalyqtandyrylǵan qyzmetter deńgeıler arasynda ókilettikter naqty jikteledi.
Tortaevtyń aıtýynsha, oblys pen aýdan ákimderin memlekettik satyp alýlar boıynsha konkýrstarǵa tóraǵalyq etýden bosatý usynylady. Belgili bolǵandaı, kóptegen usaq satyp alý sharalary iri lottarǵa biriktiriledi. Osy oraıda bul baǵyttaǵy jumystardy kásibılendirý iske asyrylmaq.
