Qarjy mınıstrligi memlekettik satyp alýǵa qatysty baqylaýdy kúsheıtpek

ASTANA. QazAqparat - Qarjy mınıstrligi memlekettik satyp alýlarǵa qatysatyn kásiporyndardyń aqsha qarajattarynyń jyljýyn baqylaýǵa alady. Bul týraly búgin QR Parlamenti Májilisinde Salyqtyq jáne kedendik ákimshilendirýdi jetildirý» taqyrybyndaǵy Úkimet saǵatynda elimizdiń Qarjy mınıstri Baqyt Sultanov málim etti, dep habarlaıdy QazAqparat.

«Eshkimge jasyryn emes, qazir memlekettiń qarjysyn talan-tarajǵa túsirý úshin kóptegen kásiporyn jalǵan kásipkerlikke júginedi nemese salyqtan jaltarý úshin kásipkerlik sýbektileri osy jalǵan kásipkerlik arqyly qolma-qol aqshalaryn shyǵaryp alady. Osyǵan baılanysty suraǵym, 2015-2016 jyldary qansha qarajat jalǵan kásipkerlik arqyly aınalymda boldy? Osyǵan sizderdiń taraptaryńyzdan qandaı sharalar qoldanylady? Jalpy, Qylmystyq Kodekstiń 215-babyn ary qaraı da qatańdatý qajet shyǵar. Salyq tólemeıtinderge jazany qatańdatý qajet», - dep suraǵan edi Májilis depýtaty Nurtaı Sabılıanov Qarjy mınıstrinen.

Saýalǵa jaýap bergen Baqyt Sultanov bul baǵytta Úkimette tıisinshe jumystar júrgizilip jatqanyn aıtty.

«Aǵymaǵy jyly ilki joba retinde tenderlerge qatysqan qurylysshylarǵa Qazynashylyq qyzmet kórsetýde arnaıy shottar ashylatyn bolady. Olar qurylys materıaldaryn satyp alǵan kezde qazynashylyq shottan qarajat jiberiledi. Odan ary salyq organdary jyljyǵan aqshany baqylaýǵa alady. Siz durys aıttyńyz. Jekelegen tabys jáne basqa salyqtar ýaqytyly memlekettik satyp alýǵa qatysatyn kásiporyn tarapynan tólenýi qajet», - degen mınıstr depýtattyń negizgi saýalyna jazbasha jaýap beretindikterin aıtty.