Qarjy mınıstrligi memlekettik satyp alýdaǵy jańashyldyqty túsindirdi

ASTANA. QazAqparat - Búgin QR Qarjy mınıstrligi Memlekettik satyp alý zańnamasy departamentiniń dırektory Sábıt Ahmetov memlekettik satyp alý týraly Zańnamaǵa engizilgen jańashyldyqtardy túsindirdi, dep habarlaıdy QazAqparat tilshisi.

Onyń aıtýynsha, 2018 jyldyń 26 jeltoqsanynda Memleket basshysy memlekettik satyp alý jáne kvazımemlekettik sektor sýbektileriniń satyp alý máseleleri týraly zańnamany jetildirýge baǵyttalǵan Zańǵa qol qoıdy. Al sol jyldyń 29 jeltoqsanynda atalǵan Zańdy júzege asyrý úshin Qarjy mınıstrliginiń buıryǵymen memlekettik satyp alýdy júzege asyrý erejesine ózgerister engizilgen.

«Bir kózden satyp alýdy qysqartý maqsatynda tapsyrys berýshige satyp alý ótpedi dep tanylǵan jaǵdaıda ony qaıta ótkizý mindetteledi. Bul bir kózden satyp alýdy qysqartýǵa múmkindik beredi. Eger 1 mlrd teńgeden asatyn satyp alýlarǵa saraptama jasaıtyn bolsaq, onda bul satyp alýlardyń 100 paıyzǵa jýyǵynyń bir ǵana áleýetti jetkizýshi jiberilgendikten ótpedi dep tanylǵanyn kórýge bolady»-, dedi ol.

Departament basshysynyń sózine qaraǵanda, aldaǵy ýaqytta da mundaı faktilerge jol bermeý úshin túbegeıli sheshim qabyldaýǵa týra kelgen.

«Endigi ýaqytta birinshi ret satyp alý ótpeı qalatyn bolsa, onda tapsyrys berýshi qaıtadan satyp alý ótkizýge mindetti. Aleger ekinshi satyp alý da ótpedi dep tanylǵan jaǵdaıda tapsyrys berýshi ótinimderdiń bolmaýyna nemese bir ótinim berýshiniń bolýyna baılanysty bir kózden ala alady», - dedi S.Ahmetov.