Qarjy mınıstrligi kvazımemlekettik sektor qarajatyn qazynaǵa aýdarý tájirıbesinen bas tartýy múmkin
ASTANA. QazAqparat - Qarjy mınıstrligi kvazımemlekettik sektor qarajatyn qazynaǵa aýdarý tájirıbesinen bas tartýy múmkin. Búgin Parlament Májilisinde Qazaqstan Respýblıkasy Úkimetiniń 2014 jylǵa respýblıkalyq bıýdjettiń atqarylýy týraly esebin tanystyrǵan Qarjy mınıstri Baqyt Sultanov osylaı málimdedi.
«Byltyrǵy bıýdjetti atqarýdyń osal tustary da boldy. Árıne, bulardyń barlyǵyn kemshilik deýge kelmeıdi, biraq olardyń barlyǵy jetildirýdi talap etetin baǵyttar. Bul sekvestrmen, salyqtyq bazany damytýmen, kedendik ákimshilendirýmen baılanysty máseleler bolyp otyr. Kvazımemlekettik sektor sýbektileriniń qarajatyn, shyǵystardyń atqarylý somasyn, kredıtterdiń qaıtarylýyn jáne jalpy shyǵystardyń atqarylý nátıjeliligin tómendetetin basqa da qarajatty baqylaý jónindegi máseleler de oryn alǵan bolatyn», - dedi B. Sultanov.
Onyń aıtýynsha, bıýdjettegi olqylyqtarǵa negizinen syrtqy jaǵymsyz qubylystar áser etip, jyldyń sońyna taman kiristerdiń aıqynsyzdyǵyn qalyptastyrǵan. Degenmen, mınıstr salyq túsimi byltyrǵy jyl sońyna qaraı 2013 jylmen salystyrǵanda artyq oryndalyp, atqarylmaý úlesi de sonshalyqty óspegenin alǵa tartady.
«Úshinshiden, kvazımemlekettik sektor sýbektilerindegi qarajat qaldyqtary ósip ketti. Baqylaýda ustaý maqsatynda ondaı qarajat burynǵydaı bankterge emes, qazynashylyqqa aýdarylady. 2014 jyldyń sońyna taman ondaı soma 6 esege artyp, 345 mlrd.teńgeni qurady. ıAǵnı, bir jaǵynan biz kvazımemelkettik sektor qarajatyn baqylaýda ustasaq, ekinshi jaǵynan ol qarajat qozǵalyssyz jatyp, ekonomıkalyq aınalymǵa túspeı qaldy. Sondyqtan da, biz aldaǵy ýaqytta kvazımemlekettik sektor qarajatyn qazynashylyqqa aýdaratyn shoǵyrlandyrý tájirıbesinen bas tartatyn shyǵarmyz», - dedi B. Sultanov.
Bul rette mınıstr álgindeı shyǵystardyń nátıjesiz bolǵanyn, josparlaǵan túpki nátıjege jetkizbegenin atap ótti.
