Qarjy mınıstrligi ıgerilmeý qaýpi bar bıýdjettik baǵdarlamalardy anyqtady
Mınıstr ortalyq jáne jergilikti organdarmen selektorlyq jıylys ótkizip jatqanyn habarlady. Olardyń bıýdjettik qarajatty ıgerýdegi máselelerin sheshýge jáne jedeldetýge ádistemelik, tehnıkalyq jáne basqa da kómekter kórsetilýde.
«Osy jumystyń nátıjesinde, birqatar ákimshiler men jergilikti organdarda ıgerilmeý qaýpi bar baǵdarlamalar anyqtaldy. Qazirgi ýaqytta ákimshilermen bıýdjet zańnamasyna sáıkes ıgerilmeý qaýipi bar bıýdjettik baǵdarlamalardyń jyldyq somasynyń 10% qaıta bólý jumystary júrgizilýde. Jumys qortyndysyn 15 qarashada jarııalaımyz. Biraq, Bilim jáne ǵylym mınıstrligi tarapynan jergilikti organdarǵa berilgen muǵalimderge qosymsha aqy tóleýge arnalǵan nysanaly transfertter 6,3 mlrd teńgege oryndalmaıdy. Ol somany qaıta bólý de múmkin emes. Óıtkeni barlyq óńirlerde osy transfert boıynsha qarajattyń artyǵymen josparlanǵany anyqtaldy», - dedi Á. Smaıylov Úkimettiń búgingi otyrysynda.
Sonymen birge, qarjy mınıstri jergilikti bıýdjet shyǵyndarynyń 3 trln 900 mlrd teńgeni quraǵanyn, onyń 68 mlrd teńgesi ıgerilmegenin jetkizdi.
«2018 jyldyń alǵashqy 10 aıynda óńirlerge 592 mlrd teńge nysanaly transfertter aýdaryldy. Jergilikti deńgeıde olardyń 95,4% nemese 565 mlrd teńgesi ıgerildi. Atqarylmaǵan 27 mlrd teńgeniń 3 mlrd teńgesi bıýdjet qarajatyn únemdeýge baǵyttalǵan. Sonda ıgerilmegen 24 mlrd teńge qalady. Bul ótken jyldyń 10 aıyndaǵy ıgerilmeý somasynan 2,1 esege kem (2017 jyly - 52 mlrd teńge)», - dep túsindirdi Á. Smaıylov.
Bıýdjetin qarajatyn ıgere almaǵan óńirler arasynda Astana qalasy - (9 mlrd teńge), Kyzylorda, Túrkistan oblystary jáne Almaty qalasy (2 mlrd teńge), Mańǵystaý, Almaty jáne Soltústik Qazaqstan oblystary (1 mlrd teńge) bar.
