Qarjy mınıstrligi 8 mln teńgege jýyq jalǵan aqsha tárkiledi
QR Qarjy mınıstrligi Memlekettik kirister komıtetinen málim etkendeı, respýblıkada bıylǵy 7 aıdyń ishinde jalpy somasy 7,9 mln teńgeni quraıtyn Qazaqstannyń ulttyq valıýtasy, sondaı-aq 10 mln teńgeden astam somanyń sheteldik valıýtasy aınalymnan alyndy.
«Jasandy aqsha qarajatynyń kóp bóligi Almaty qalasynan (776 dana nemese 53,4%), Qyzylorda oblysynan (190 nemese 13%), Astana qalasynan (134 nemese 9%), Qaraǵandy oblysynan (109 nemese 7,5%) alyndy. Faktilerge súıener bolsaq, eń jıi qoldan jasalatyny - 10 000 (531 dana nemese 36,5%), 2 000 (527 dana nemese 36,3%), 1000 (89 dana nemese 6%), 5000 (72 dana nemese 4,9%) jáne 20 000 teńgelik (53 dana nemese 3,6%) valıýtalar», - dep atap ótti komıtetten.
Kóp jaǵdaıda anyqtaý múmkindiginiń bolmaýyna baılanysty jalǵan aqshanyń kóp bóligi dúkenderde jáne bazarlarda esep aıyrysý retinde nemese qoǵamdyq oryndarda aqshany usaqtaý túrinde aınalymda bolady.
«Buǵan birneshe sebep bar. Keıbirine toqtala ketsek. Birinshiden, qazirgi zamanǵy tehnologııalar jaǵdaıynda jalǵan aqsha jasaýdy qylmystyq toptar joǵary kásibı deńgeıge jáne aǵynǵa qoıǵan. Mamandardyń aıtýynsha, jalǵan aqsha jasaýshylar valıýtanyń túsin, bederin, sýtańbany, qorǵanysh jipterin asa dáldikpen qaıtalaıdy. Sol sebepti shynaıy aqshany jalǵan aqshadan aıyrý qıynǵa soǵady. Satýshylardyń kópshiliginde tipti kúdik týmaıdy. Ekinshiden, azamattar banknotanyń túpnusqalylyǵy jaıly qarapaıym belgilerdi bilmeıdi jáne saýda oryndarynda (dúkender, bazarlar, AMQS) aqsha qaıtarymyn teksermeı, jeńil qabyldaıdy», - delingen habarlamada.
Jalǵan aqsha qolyna túskenin baıqaǵan adamdardyń azyn-aýlaǵy ǵana polıtsııaǵa nemese bankke júginedi. Kóbinese, jasandy aqsha belgilerin baıqap, adam mundaı aqshadan ózine túsken tásilmen qutylýǵa tyrysady. Bul jalǵan aqsha qarajatyn ótkizý retinde baǵalanýy múmkin. Biraq qylmys qurbany bolǵansha, eski aqsha úlgilerin bilgen jáne jańa aqsha úlgilerin zerttegen abzal.
Memlekettik kirister komıtetiniń Ekonomıkalyq tergeý qyzmeti jalǵan aqshalardy ótkizýshilerdi ǵana emes, sonymen qatar daıyndaýshylardy anyqtaý boıynsha belgili bir jumys júrgizgen. Osy jyldyń tek 8 aıynda jalǵan aqsha daıyndaıtyn 3 astyrtyn tseh anyqtaldy.
Sonymen qatar, shetel valıýtasynda, atap aıtqanda, 32 700 AQSh dollary bolatyn jalǵan aqsha belgisin ótkizgeni úshin Almaty oblysy Qarasaı aýdandyq sotynyń ókimimen Tájikstannyń 2 azamaty jáne Qazaqstannyń 2 azamaty 5 jyl bas bostandyǵynan aıyrýǵa sottalǵan.
