Qarjy mınıstrligi 52 mlrd teńgege qarjylyq buzýshylyqtardy anyqtady

NUR-SULTAN. QazAqparat – 2021 jyldyń 1-toqsanynda 52 mlrd teńgege qarjylyq buzýshylyqtar anyqtaldy. Bul týraly búgin Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Osy jylǵy 1-toqsanda kameraldyq baqylaýmen somasy 2,9 trln teńgege 305 myńnan astam memlekettik satyp alý rásimi qamtyldy. Tekserý qorytyndylary boıynsha 9 111 rásim boıynsha buzýshylyqtar anyqtaldy. Memlekettik aýdıt nysandary buzýshylyqtardy joıý týraly 8 547 habarlamany oryndady. 855 aýdıtorlyq is-sharalar ótkizildi», - dedi ol.

Mınıstrdiń dereginshe, 422 mlrd teńge bıýdjet qarajaty aýdıtpen qamtyldy. Sonyń ishinde somasy 52 mlrd teńge qarjylyq buzýshylyqtar anyqtaldy.

«Taýarlardy jetkizýmen, qyzmetterdi kórsetýmen jáne jumystardy oryndaýmen qalpyna keltirý, bıýdjetke óteý jáne esepke alý boıynsha kórsetý jolymen 44 mlrd teńgege buzýshylyqtar joıyldy. Aýdıt nysandary qyzmetiniń tıimdiligin jetildirý jáne arttyrý úshin 707 usynym berildi», - dedi Erulan Jamaýbaev.