Qarjy mınıstri jekeshelendirýdegi problemalardy atady

ASTANA. QazAqparat - Búgin Úkimettiń selektorlyq rejimdegi otyrysynda QR Qarjy mınıstri Baqyt Sultanov jekeshelendirýdegi problemalardy atady, dep habarlaıdy QazAqparat.

Mınıstrdiń aıtýynsha, birinshiden aǵymdaǵy jyldyń 1 qazanyndaǵy jaǵdaı boıynsha taratý jáne qaıta qurý satysyndaǵy 211 nysannyń tek 80 nysany ǵana  taratyldy. 131 nysan taratý jáne qaıta qurý satylarynda.  Bul rette, 3-4 jyl buryn taratý nemese qaıta qurý jóninde sheshim qabyldanǵan nysandar da bar. Bul nysandar osy kúnge deıin áli taratylmaǵan.

«Aǵymdaǵy jyly 5 nysan boıynsha taratý rásimi bastalmaǵan. Atalǵan zańdy tulǵalar organdarynyń tıisti sheshimderi joq. Olardyń ishinde 4 nysan - kommýnaldyq menshik boıynsha jáne 1 nysan - respýblıkalyq menshik boıynsha, ol Aýyl sharýashylyǵy mınıstrligine tıesili. Al kommýnaldyq menshik nysandary Qaraǵandy, Aqmola, Ońtústik Qazaqstan oblystarynda», - dedi ol.

Ekinshiden, onyń sózine qaraǵanda, aýyrtpalyqtary jáne qaıta qurylýyna baılanysty saýda-sattyqqa shyǵarylmaıtyn nysandar da bar. Mundaı nysandardyń jalpy sany - 7. Olar 2018 jylǵa aýystyrylatyn bolady.

«Osyǵan baılanysty birinshiden, ákimdikterge, memlekettik organdarǵa áleýmettik aspektini eskere otyryp, taratý rásimderin údemeli qarqynmen bastaýdy, árbir nysan boıynsha oryndaý merzimderimen qadamdyq is-sharalardy qamtıtyn taratylmaǵan barlyq nysandar boıynsha olardy taratý Jol kartalaryn ázirleýdi, ekinshiden, ákimdikterge aǵymdaǵy jylǵa arnalǵan jospardyń oryndalýy boıynsha monıtorıng pen turaqty baqylaý júrgizýdi usynamyz», - dedi Baqyt Sultanov.

Foto: PrimeMinister.kz