Qarjy mınıstri jańa Keden kodeksiniń mańyzdy tustaryn atady
«Birinshiden, memleketústi kedendik kodekstiń normalary eskerile otyryp, bıznes pen kedenniń elektrondy ózara árekettestik basymdylyǵy bekitildi. Taýarlardy deklaratsııalaý jáne shyǵarý protsesi avtomattandyrylatyn bolady. Budan bylaı, táýekelder bolmaǵan jaǵdaıda aqparattyq júıe kedendik deklaratsııalar boıynsha sheshimdi sanaýly mınýttarda qabyldaıtyn bolady», - dedi Baqyt Sultanov.
Sonymen birge, mınıstrdiń aıtýynsha, deklaratsııany qaraýdyń eń joǵary merzimi bir jumys kúninen 4 saǵatqa deıin qysqartyldy. Mundaı jańalyq bıznestiń shyǵyndaryn aıtarlyqtaı azaıtady jáne taýarlardy ótkizý pýnkti arqyly tasymaldaýdy tezdetedi.
Ekinshiden, álemdik ozyq tájirıbelerdiń úlgisi boıynsha tranzıttik deklaratsııalar men jolaýshylardyń kedendik deklaratsııalaryn keden qyzmetkerleriniń toltyrý múmkindigi engizildi. Bul brokerlik kompanııalar qyzmetine balama bolyp tabylady.
Úshinshiden, «Memleket jáne bıznes seriktestigi» prıntsıpin qamtamasyz etý maqsatynda ýákiletti ekonomıkalyq operatorlarǵa arnalǵan jeńildikter qaıta qaraldy. Endi olar Eýrazııalyq ekonomıkalyq odaqtyń barlyq aýmaǵyndaǵy tranzıt kezinde qosymsha jeńildikterge ıe bolady.
Tórtinshiden, aldynǵy qatarly aqparattyq tehnologııalar men sheshimderdi qoldaný maqsatynda jańa norma - elektrondy kedendik ilesý engizildi. Ol qazirgi ýaqytta qoldanylyp júrgen taýarlarǵa fızıkalyq ilesip júrýdi almastyratyn bolady.
Besinshiden, kedendik ákimshilendirýdiń tólemder bóligi jetildirildi, sonyń nátıjesinde kedendik tólemderdi aldaǵy mindettemeler esebinen avanspen engizý, sondaı-aq olardy kedendik tólemderdiń, salyqtardyń tólenýine paıdalaný múmkindikteri bekitildi.
Sonymen birge, Qarjy mınıstri jańa Kodeks kúshine engen soń memlekettiń jáne bıznestiń ózara árekettestigi jańa deńgeıge shyǵatynyn jáne syrtqy ekonomıkalyq qyzmet ońtaılanyp, rettele túsetinin atap ótti.
