Qarjy mınıstri úkimettik qaryzdyń kólemin atady
«Bıýdjetke boryshtyq júktemeni tómendetý boıynsha sharalar qabyldandy. Tapshylyqtyń mólsheri syrtqy memlekettik qaryz alýdy azaıtý esebinen JІÓ-ge shaqqanda 2,6 paıyzdan 1,2 paıyzǵa deıin qysqardy. Boryshtyq qarjylandyrýda basymdyq ishki kózderge berilgen», - dedi mınıstr.
Onyń aıtýynsha, 2018 jylǵy 1 qazandaǵy jaǵdaı boıynsha memlekettik borysh 14,5 trln teńgeni nemese JІÓ-niń 24,8 paıyzyn qurady.
«Memlekettik boryshtyń jalpy kóleminiń 76 paıyzyn úkimettik qaryz quraıdy. Ol - 11 trln teńge nemese JІÓ-niń 18,8 paıyzy. Úkimettik boryshtyń jalpy kóleminde ishki borysh 55 paıyzdy quraıdy, al 45 paıyz - syrtqy borysh», - dedi ol.
Mınıstrdiń sózine qaraǵanda, Úkimettiń kúsh-jigeri úkimettik boryshtyń absolıýttik kórsetkishterin qysqartýǵa emes, ony qaýipsiz deńgeıde ustaýǵa baǵyttalǵan. Boryshtyq júkteme halyqaralyq reıtıngtik agenttikterdiń usynystaryna sáıkes 2018 jyly 15 paıyzdyq lımıtte 12,2 paıyz deńgeıinde qalyptasty.
«Osylaısha, qazirgi ýaqytta úkimettik borysh deńgeıi men oǵan qyzmet kórsetý jáne óteý boıynsha aǵyndar ruqsat etilgen jáne qaýipsiz shekte. Qazaqstan orta merzimdi kezeńde óziniń boryshtyq mindettemelerin oryndaı alady»,- dedi Á.Smaıylov.
