Qarjy mınıstri taýarlardy tańbalaý memleket, halyq pen bızneske ne beretinin túsindirdi

NUR-SULTAN. QazAqparat – Qarjy mınıstri Erulan Jamaýbaev taýarlardy tańbalaý memleket, halyq pen bızneske ne beretinin aıtyp berdi, dep habarlaıdy QazAqparat tilshisi.

«Taýarlardy tsıfrlyq tańbalaý kelesi maqsattarǵa qol jetkizýge baǵyttalǵan: memleket úshin taýarlardyń zańsyz aınalymyn qysqartý, bıýdjetke salyq túsimderiniń túsýin ulǵaıtý, memlekettik baqylaý sapasyn arttyrýǵa múmkindik beredi. Halyq úshin qoǵamdyq baqylaýdyń tıimdiligi, tutynýshylardyń quqyqtaryn qorǵaý, azamattardyń ómiri men densaýlyǵyn qorǵaýǵa jol ashady. Bıznes úshin, atap aıtqanda adal salyq tóleýshiler úshin bıznes júrgizýdiń básekelestik jaǵdaılaryn arttyrýǵa kómektesedi», - dedi Erulan Jamaýbaev Úkimet otyrysynda.

Qarjy mınıstri buǵan deıin aıtylǵanyndaı, temeki ónimderin tańbalaý boıynsha pılottyq joba júrgizilgenin atap ótti.

«Pılottyq joba sheńberinde satylǵan temeki buıymdaryn aınalymnan shyǵara otyryp, túpkilikti tutynýshyǵa satylǵanǵa deıin óndirýdi/ımportty qosa alǵanda, temeki ónimderin tańbalaýdyń barlyq tsıkli pysyqtaldy Qajetti normatıvtik quqyqtyq aktiler qabyldandy. «Tańbalaýǵa jatatyn taýarlardyń tizbesin aıqyndaý týraly» Úkimet qaýlysyna sáıkes, 2020 jylǵy 1 qazannan bastap quramynda temeki bar fıltrli sıgaretter jáne 2021 jylǵy 1 sáýirden bastap stıkter, sıgaralar, sıgarılder, qyzdyrylatyn temeki sııaqty temeki ónimderiniń ózge de túrleri mindetti túrde tańbalaýǵa jatady», - dedi ol.