Qarjy mınıstri salyq jáne kedendik turǵyda qosymsha túsimder týraly aıtty
NUR-SULTAN. QazAqparat – Memleket óziniń áleýmettik mindettemelerin tolyǵymen oryndady. Bul týraly Parlament palatalarynyń birlesken otyrysynda Qarjy mınıstri Erulan Jamaýbaev málim etti, dep habarlaıdy QazAqparat tilshisi.
«Úkimet esebi Parlamenttiń Májilisi men Senatynda egjeı-tegjeıli qaraldy. Esepti qaraý kezinde ekonomıkanyń barlyq salalary boıynsha 500-den astam suraqtar men usynystar berildi. Olar jumys toptarynda jáne salalyq komıtetterde jetkilikti talqylandy. Parlament depýtattarynyń usynymdary Úkimet jumysynda eskeriletin bolady.
Respýblıkalyq bıýdjettiń negizgi parametrleri tolyq atqaryldy. Bıýdjet túsimderi 12 trln 49 mlrd teńgeni nemese josparǵa 100,3 paıyzdy qurady. ıAǵnı jospar oryndaldy. Shyǵystar 98,3 paıyzǵa ıgerildi jáne 14 trln 234 mlrd teńge boldy», - dedi E. Jamaýbaev Úkimet pen Esep komıtetiniń 2020 jylǵa arnalǵan respýblıkalyq bıýdjettiń atqarylýy týraly esepterin qaraý kezinde.
Bıýdjet tapshylyǵy 2 trln 185 mlrd teńgeni nemese jalpy ishki ónimniń 3,1 paıyzyn qurady.
«Ekonomıkalyq ósýdi qalpyna keltirý jónindegi Keshendi jospar der kezinde ázirlenip, qabyldandy. Bul jumys oryndary men iskerlik belsendilikti saqtaýǵa múmkindik berdi. Respýblıkalyq bıýdjettiń atqarylýy týraly Esep komıteti Úkimettiń esebine birqatar eskertýler men usynymdar berdi. Esep komıteti salyqtyq ákimshilendirý máselelerine erekshe nazar aýdardy. Atap aıtsaq, qosymsha salyq túsimderiniń 7 esege tómendeýi týraly eskertý boldy. Shyn máninde, 2020 jylǵa arnalǵan naqtylanǵan respýblıkalyq bıýdjette qosymsha salyq túsimderiniń josparly kólemi 1,5 trln teńgeni emes, 476 mlrd teńgeni quraǵan. Bul rette, Esep komıteti salyqtyq jáne kedendik tekserýler men kameraldyq baqylaý nátıjeleri boıynsha ǵana qosymsha túsimderdi eskeredi. Alaıda fıskaldyq organdar qoldanatyn sharalar áldeqaıda keń jáne onyń ishinde ákimshilendirýdegi tsıfrlyq qoldanýdy da qamtıdy. Salyqtyq jáne kedendik sharalar esebinen is júzinde qosymsha túsimder 710 mlrd teńge. Bul ótken jyly qoldanylǵan tekserýlerge moratorııge jáne bızneske usynylǵan salyqtyq jeńildikterge qaramastan bolyp otyr», - dedi mınıstr.
Onyń sózine qaraǵanda, osylaısha is júzinde daǵdarys jaǵdaıynda qosymsha túsimder kóleminiń azaıýyna jol berilmeı, kerisinshe, bekitilgen josparly kiris kólemi 1,5 ese asyra oryndaldy.
