Qarjy mınıstri salyq boıynsha jospardyń nelikten oryndalmaǵanyn aıtty
«Respýblıkalyq bıýdjetke kirister (transfertterdi esepke almaǵanda) 2 trln 714 mlrd teńge somasynda tústi nemese jospar 83,3 paıyzǵa atqaryldy. Kirister boıynsha jospardyń atqarylmaýy 544 mlrd teńgeni qurady. Negizgi atqarylmaý somalary qosylǵan qun salyǵy jáne korporatıvtik tabys salyǵyna tıesili boldy», - dedi mınıstr Úkimet otyrysynda.
Korporatıvtik tabys salyǵynyń atqarylmaýyna kelesi faktorlar áser etken:
- negizgi eksporttyq pozıtsııalar boıynsha baǵanyń orta eseppen 16,1 paıyzǵa tómendeýi (shıki munaıǵa – 35,8%, myrysh - 21,5%, alıýmınıı - 12,7%, ferrohrom - 8,4%, mys - 8,5% jáne qorǵasyn - 9,8%), bul taý-ken sektoryndaǵy iri salyq tóleýshilerden túsetin túsimderdiń 42,6 paıyzǵa azaıýyna ákep soqtyrdy;
- 830 iri salyq tóleýshi boıynsha málimdelgen avanstyq tólemder somasynyń ótken jyldyń 7 aıymen salystyrǵanda 184,3 mlrd teńgege tómendeýi;
- ekinshi deńgeıdegi bankterden túsetin túsimderdiń 30 mlrd teńgege azaıýy.
Qosylǵan qun salyǵy boıynsha jospardyń negizgi atqarylmaý sebepteri:
- 2019 jyldan edáýir aýyspaly debettik qaldyqtyń bolýyna baılanysty ótken jyldyń uqsas kezeńimen salystyrǵanda qosylǵan qun salyǵyn qaıtarýdyń 84,4 paıyzǵa ósýi;
- «Elektrondyq shot-faktýralar» AJ derekteri boıynsha satý boıynsha aınalymdardyń 12,4 paıyzǵa azaıýy. Negizgi tómendeý taý-ken ónerkásibi salasyna tıesili, onda aınalymdar 2019 jyldyń uqsas kezeńimen salystyrǵanda 34,4 paıyzǵa nemese 3,5 trln teńgege tómendegen.
- karantın rejımi engizilýine baılanysty iskerlik belsendiliktiń tómendeýi shamamen 19,3 myń salyq tóleýshi tólemderin 187 mlrd teńgege tómendetti;
- Qazaqstan Respýblıkasynyń úshinshi eldermen taýar aınalymy 9,1 paıyzǵa, onyń ishinde maýsym aıynda 23,6 paıyzǵa tómendeýi jáne Qytaı Halyq Respýblıkasynan taýarlar ımporttaıtyn kólik quraldarynyń sany 16,7 paıyzǵa tómendeýi tirkeldi.
