Qarjy mınıstri orman sharýashylyǵyna qansha teńge bólingenin aıtty

ASTANA. QazAqparat – Premer-Mınıstrdiń orynbasary – QR Qarjy mınıstri Erulan Jamaýbaev orman sharýashylyǵy komıtetin qarjylandyrýǵa qatysty tilshilerdiń suraqtaryna jaýap berdi, dep habarlaıdy QazAqparat tilshisi.

«2023-2025 jyldarǵa arnalǵan úsh jyldyq bıýdjetke –121,5 mlrd teńge, bıylǵy jylǵa 52,7 mlrd teńge bólingen. Ótken jylǵy qarajat kólemi azyraq edi», – dedi Erulan Jamaýbaev úkimet aıasynda.

Sondaı-aq Qarjy mınıstri eskirgen tehnıka máselelerine túsinik berdi.

«Belgili bir normatıvter bar, is júzinde osy normatıvter boıynsha qarjylandyramyz. Qajettilik normasy da naqty jazylǵan. Bir jyl ishinde barlyq tehnıkany jańartý múmkin emes ekeni anyq. Egjeı-tegjeıli qaraý kerek», – dedi mınıstr.

Onyń aıtýynsha, salany qosymsha qarjylandyrý áli qarastyrylmaǵan.

«Komıssııa jumys istep jatyr, qansha qarajat qajet ekenin anyqtaımyz. Aldyn ala zalal týraly áli aıta almaımyz, óıtkeni órt áli sóndirilgen joq. Aıtarlyqtaı úlken aýmaqty ot sharpydy, sondyqtan barlyq rásimderdiń aıaqtalýyn kúteıik», – dep qorytyndylady Premer-Mınıstrdiń orynbasary.